पाँच सयभन्दा बढी संरचना भत्काएपछि रोकिए हेटौँडा बजारमा चलाइएका डोजर

हेटौँडा बजार सडक किनारका पाँच सयभन्दा बढी घरटहरा भत्किएपछि सडक विस्तार तत्कालका लागि रोकिएको छ । हेटौँडा बजार क्षेत्रको २५–२५ गज सडक विस्तार अभियान सर्वोच्च अदालतको उत्प्रेषण (स्टे) आदेशपछि तत्कालका लागि रोकिएको हो । 

शुक्रबार सर्वोच्च अदालतले जारी गरेको आदेश आइतबार दिउँसो १२:४६ बजे सडक डिभिजन कार्यालय, हेटौँडामा तामेल भएपछि विस्तार तथा संरचना भत्काउने सबै कार्य स्थगित भएको कार्यालय प्रमुख गुरुप्रसाद अधिकारीले जानकारी दिए । सडक विस्तारको प्रक्रिया कानुनी भए पनि सर्वोच्चको आदेशको सम्मानस्वरूप डोजर तथा मेसिनरी प्रयोग गरेर गरिँदै आएको भौतिक संरचना भत्काउने काम रोकिएको उनले बताए । अदालतको आदेशबारे शुक्रबार नै सार्वजनिक सूचनामार्फत थाहा भए पनि आधिकारिक पत्र नआएकाले शनिबारदेखि सडक विस्तार अघि बढाइएको प्रमुख अधिकारीको भनाइ छ ।

शनिबार बिहान ५ बजेदेखि १२ घण्टासम्म हेटौँडाको राप्ती रोड, बुद्धचोक, मेन रोड, रातोमाटे, पीपलबोट हुँदै चौकीटोल ओरालोसम्मका पाँच सयभन्दा बढी संरचना भत्काइएका थिए । केही घरधनीले स्टे अर्डर आदेश देखाए पनि डिभिजनले पत्र नआएको कारण दिएर भत्काउने काम जारी राखेको थियो । १० वटा मेसिन प्रयोग गरेर करिब पाँच सय सुरक्षाकर्मीको उपस्थितिमा प्राविधिक रूपमा अधिकांश घरका ढोका, झ्याल, सटर तथा माथिल्लो भाग भत्काइएका थिए । संरचनाहरू पूर्ण रूपमा नहटाइए पनि पाँच सयभन्दा बढी घर–टहरा क्षतिग्रस्त बनाइएका छन् ।

सडक डिभिजनले ९.५ किलोमिटर क्षेत्रमा सडक विस्तार गर्ने योजना बनाए पनि शनिबार करिब २.५ किलोमिटर क्षेत्र मात्र बाँकी थियो । आइतबार बिहानदेखि पुनः काम सुरु गर्ने तयारी भए पनि सर्वोच्चको आदेश कार्यालय पुग्नेबित्तिकै काम रोकिएको प्रमुख अधिकारीले बताए । ‘सर्वोच्चको आदेशको पालना गर्नु हाम्रो दायित्व हो । २६ मंसिरमा हुने सुनुवाइपछि मात्र आगामी प्रक्रिया तय हुन्छ,’ उनले भने ।

अधिकारीका अनुसार सडक डिभिजनले आइतबार भत्काइएका संरचनाको व्यवस्थापनमा स्थानीयलाई सहयोग गरेको छ । केही दिन घरधनीको मागअनुसार समय दिइने र त्यसपछि स्क्र्याब तथा अवशेष हटाउन डिभिजनले पुनः प्रक्रिया अघि बढाउने उनले बताए । सडक विस्तारलाई ‘एसियन हाइवे’को मापदण्डअनुसार पुनर्निर्माण गर्ने लक्ष्यसहित २५ गजबाहिरका जग्गाधनीलाई मुआब्जा वितरण, सेट–ब्याक निर्धारण तथा सडक स्तरोन्नतिसम्बन्धी डिपिआर तयार गर्ने कार्यसमेत अघि बढाइने अधिकारीले बताए । बजेट उपलब्ध भएसँगै चालू आर्थिक वर्षमै टेन्डर प्रक्रियामा जाने तयारी रहेको उनको भनाइ छ ।

हेटौँडा उपमहानगरपालिका क्षेत्रभित्र सडक डिभिजन कार्यालयले सुरु गरेको राजमार्ग विस्तार अभियानअन्तर्गत यस क्षेत्रमा पर्ने ५३१ मध्ये पाँच सयभन्दा बढी संरचना भत्काइएका छन् । १९ मंसिर (शुक्रबार) १५ दिने अल्टिमेटम सकिएसँगै सडक डिभिजन कार्यालयले शनिबारैदेखि डोजर र एक्स्काभेटर प्रयोग गरी संरचना हटाउने काम अगाडि बढाएको थियो ।

गुरुप्रसाद अधिकारी, प्रमुख सडक डिभिजन, हेटौँडा
सर्वोच्चको आदेशको पालना गर्नु हाम्रो दायित्व हो । २६ मंसिरमा हुने सुनुवाइपछि मात्र आगामी प्रक्रिया तय हुन्छ ।