साथीसँग खेल्न जान्छु भनेर घरबाट निस्किएकी मोरङको लेटाङ नगरपालिका– २, बुधबारेकी १३ वर्षीया अंशु गौतमको हत्याको रहस्य एक महिना बितिसक्दा पनि प्रहरीले पत्ता लगाउन सकेको छैन । गत २१ असोजमा साथीसँग ‘खेल्न जान्छु’ भन्दै घरबाट निस्किएकी गौतमको शव १८ दिनपछि ७ कात्तिकमा घरबाट साढे चार किलोमिटर टाढाको जंगलमा क्षतविक्षत अवस्थामा फेला परेको थियो ।
प्रहरीले अंशुको शव अनुसन्धानका लागि भन्दै सुनसरीको धरानस्थित बिपी कोइराला स्वास्थ्य विज्ञान प्रतिष्ठानको शवगृहमा राखिएको छ । प्रहरीले उनले लगाएको कपडाबाट जंगलमा क्षतविक्षत रूपमा फेला परेको शव अंशुकै भएको यकिन गरे पनि थप पुष्टि हुन शवको डिएनए परीक्षण गर्ने भएको छ । अंशुको परिवारले छोरीको बलात्कारपछि बीभत्स हत्या भएको भन्दै न्याय नपाएसम्म शव नबुझ्ने अडान राखेको छ ।
मोरङका एसपी कवित कटुवालले जंगलमा फेला परेको अंशुको क्षतविक्षत शव उनको हुलिया र कपडाका आधारमा यकिन भए पनि शवको डिएनए परीक्षणपछि मात्रै पुष्टि हुने बताए । उनका अनुसार डिएनए परीक्षण प्रतिवेदन आएपछि अंशुको मृत्यु रहस्य पत्ता लगाउन थप यकिन हुनेछ । एसपी कटुवालले हत्याको रहस्य पत्ता लगाउन विशेष अनुसन्धान टोली नै परिचालन गरिरहेको र घटनास्थलबाट संकलन गरिएका प्रमाणलाई फरेन्सिक परीक्षणका लागि प्रहरीको विधि विज्ञान प्रयोगशालामा पठाइसकेको बताए । ‘डिएनए परीक्षण प्रतिवेदनपछि हामीलाई शव अंशुकै हो भन्ने पक्का यकिन हुनेछ र अनुसन्धान अगाडि बढाउन पनि थप आत्मबल मिल्नेछ,’ उनले भने ।
अंशुका ठुलाबुवा दामोदर गौतमले जबसम्म प्रहरीले अनुसन्धान पूरा गरेर छोरीको हत्यामा संलग्न दोषीलाई सार्वजनिक नगरेसम्म शव नबुझ्ने बताए । ‘चाँडो डिएनए परीक्षणको रिपोर्ट ल्याएर अपराधीलाई कानुनी दायरामा नल्याएसम्म हामी छोरीको शव बुझेर कुनै हालतमा दाहसंस्कार गर्दैनौँ,’ उनले भने । गौतम परिवार र लेटाङवासीले जंगलमा फेला परेको शव बालिका अंशुकै भएको र उनको कसैले अपहरण गरेर बलात्कार गरेर कञ्चनपुरकी बालिका निर्मला पन्तको जस्तै बीभत्स हत्या गरेको दाबी गरेका छन् ।