सेप्टेम्बरसम्ममा सेयर खरिद–बिक्री सम्पन्न गर्ने गरी प्रक्रिया अघि बढ्यो
हिमालयन बैंकमा रहेको पाकिस्तानी बैंक हबिबको सेयर संस्थापक हकदारहरूबाट उम्काएर हत्याउने हिमालयन रि–इन्स्योरेन्स समूहको ‘सेटिङ’ अन्तत: विफल भएको छ । सबैभन्दा बढी मूल्य कबोल गरेको नेसनल लाइफ इन्स्योरेन्सलाई आफ्नो सेयर बेच्न पाकिस्तानी बैंक हबिब सहमत भएको छ ।
हिमालयन बैंकका सिइओ अशोक राणा भन्छन्–
नेसनल लाइफ इन्स्योरेन्स संस्थापक भएका कारण स्वाभाविक हकदार थियो । उसले गरेको कबुल रकम बढी छ । त्यसमा हबिब सहमत भयो । नेसनलसँग कारोबार गर्न अघि बढ्ने हबिबले जानकारी गराएको छ ।
गत ३० जेठमा हबिबले प्रतिकित्ता न्यूनतम एक सय १२ रुपैयाँ आठ पैसाका दरले दुई करोड ८० लाख १२ हजार चार सय ४७ दशमलव ४५ कित्ता सेयर बिक्रीमा राखेको थियो । सबैभन्दा बढी कबोल गर्ने नेसनल लाइफ इन्स्योरेन्सलाई सेयर बेच्न हबिब सकारात्मक रहेको सन्देश पठाएको हिमालयन बैंकका प्रमुख कार्यकारी अधिकृत अशोक राणाले जानकारी दिए ।
उनले भने, ‘नेसनल लाइफ इन्स्योरेन्स संस्थापक भएका कारण स्वाभाविक हकदार थियो । उसले गरेको कबुल रकम बढी छ । त्यसमा हबिब सकारात्मक देखियो । नेसनलसँग कारोबार गर्न अघि बढ्ने हबिबले जानकारी गराएको छ ।’ नेसनलले हबिबको पूरै सेयर प्रतिकित्ता ११८.८८ रुपैयाँमा खरिद गर्ने भन्दै आवेदन दिएको थियो । प्रभु महालक्ष्मी लाइफ इन्स्योरेन्सले प्रतिकित्ता एक सय १५ रुपैयाँका दरले दुई लाख ५० हजार कित्ता मात्रै सेयर किन्न निवेदन दिएको थियो । अर्का एकजना व्यक्तिलले २५ लाख कित्ता सेयरका लागि निवेदन दिएका थिए । ती व्यक्तिले प्रतिकित्ता एक सय १६ रुपैयाँका दरले मूल्य तिर्ने प्रस्ताव गरेका थिए । बढी मूल्यमा नेसनल लाइफले सेयर किन्ने भएपछि उसको दाबीलाई हबिबले स्विकारेको हो ।
गत ३० जेठमा हिमालयन बैंकले पाकिस्तानको हबिब बैंकको स्वामित्वमा रहेको दुई करोड ८० लाख १२ हजार ४४७.४५ कित्ता सेयर संस्थापक सेयरधनीका लागि बिक्रीमा राखेको थियो । नेपाल राष्ट्र बैंकले पहिलो प्राथमिकता संस्थापक सेयरधनीलाई दिनुपर्ने व्यवस्था गरेको छ । प्रतिकित्ता एक सय १२ रुपैयाँ आठ पैसा मूल्य तोकी बिक्रीमा राखिएको यस्तो सेयरमा संस्थापन सेयरधनीले आवेदन दिने समय १ साउनसम्म राखिएको थियो । म्यादसम्म संस्थापक सेयरधनीले आवेदन नदिएमा अन्य व्यक्ति वा संस्थालाई सेयर बेच्न पाउने व्यवस्था छ । सोही व्यवस्थाको दुरुपयोग गर्दै सबै संस्थापकलाई सेयर किन्नबाट रोकेर हिमालयन रि–इन्स्योरेन्समा लगानी गर्ने मुख्य समूहले हिमालय बैंकको सो सेयर हत्याउने प्रयास गरेको थियो । उक्त समूहले पुँजीगत लाभकरसमेत छल्ने गरी सेयर हत्याउने प्रयास गरेको थियो । तर, नेसनल लाइफले सेयर खरिदमा आवेदन गरेपछि उक्त समूहको प्रयास विफल भएको हो ।
अब नियामकीय व्यवस्थाअनुसार सेयर खरिद–बिक्रीका प्रक्रियाहरू अघि बढ्नेछ । ‘खरिद र बिक्री गर्ने कार्यमा उहाँहरू नै सक्रिय हुनुपर्नेछ । त्यसमा बैंकले सहजीकरण गरिदिनेछ,’ उनले भने, ‘अब नेपाल राष्ट्र बैंक, धितोपत्र बोर्ड नेपाल र नेपाल बिमा प्राधिकरणका नियामकीय व्यवस्थाअनुसारका प्रक्रिया अघि बढ्नेछन् ।’ आगामी सेप्टेम्बरसम्ममा सेयर खरिद–बिक्रीको काम सम्पन्न हुने अनुमान गरेको उनले बताए । हालसम्म हिमालयन बैंकमा संस्थापक र साधारण सेयर गरेर १.२५ प्रतिशत नेसनल लाइफको स्वामित्व कायम छ । हबिबको सेयर किनेपछि यो बैंकमा नेसनल लाइफको १४.१८ प्रतिशत स्वामित्व कायम हुनेछ । हबिब र नेसनल लाइफ सेयर खरिद–बिक्रीमा सकारात्मक भएसँगै दीपक भट्ट र शंकर अग्रवाल आबद्ध रहेको हिमालयन रि–इन्स्योरेन्स समूहको सेटिङ भत्किएको छ । यद्यपि, अरू निकायमा सेयर खरिद–बिक्रीको प्रक्रिया बाँकी रहेकाले त्यसमा पनि हिमालयन रि–इन्स्योरेन्स समूहले चलखेल गर्ने जोखिम उत्तिकै रहेको राष्ट्र बैंक स्रोतको भनाइ छ ।
