नेपालका पूर्वनम्बर एक गल्फर शुक्रबहादुर राईले सूर्य नेपाल गल्फटुर २०२४–२५ अन्तर्गतको सातौँ प्रतियोगिता सूर्य नेपाल च्यालेन्जमा कोर्स रेकर्डसहित उपाधि हात पारेका छन् । समग्रमा १७ अन्डर दुई सय ५५ को प्रभावशाली स्कोरमा शुक्रले दोस्रो स्थानमा रहेका नीरज तामाङलाई चार स्ट्रोकले हराउँदै उपाधि आफ्नो नाममा लेखाएका हुन् । शुक्रले एमेच्योर गल्फर सद्भाव आचार्यका नाममा रहेको १५ अन्डर ५७ को रेकर्ड तोडे । सद्भावले यही सिजन सूर्य नेपाल काठमाडौं ओपनमा रेकर्ड बनाएका थिए ।
उपाधि विजेता शुक्रले एक लाख १० हजार रुपैयाँ प्राप्त गरे । उनको यो करिअरको ११औँ उपाधि हो ।
यो सिजन तीन उपाधि जितेका नीरजले समग्रमा १३–अन्डर दुई सय ५९ को स्कोर ल्याएका थिए । उपविजेता बनेका उनले ७० हजार रुपैयाँ जिते । समग्रमा आठ अन्डर दुई सय ६४ को स्कोरका साथ दिनेश प्रजापतिले तेस्रो स्थानमा प्रतियोगिता सकाए । उनले ५० हजार रुपैयाँ जिते । नेपालका नम्बर एक गल्फर समग्रमा एक अन्डर दुई सय ७१ स्कोरका साथ नवौँ स्थानमा रहेका छन् ।
सुरुवातमै तीन स्ट्रोकको अग्रता
शुक्रले दिनको सुरुवातमै तीन स्ट्रोकको अग्रता लिएका थिए । उनले दोस्रोदेखि पाँचौँ होलसम्म लगातार चार बर्डी निकाले । यो प्रदर्शनसँगै उनलाई अन्य गल्फरले चुनौती दिन सकेनन् । उनले फ्रन्ट नाइन चार अन्डर ३० स्कोर गरे । शुक्ररले ५ पारको १०औँ होलमा इगल १३औँ र १४औँ होलमा समान एक सट बचाउँदै ब्याक नाइन दुई अन्डर ३२ स्कोर गरे । नीरजले पहिलो, चौथो र पाँचौँ होलमा बर्डी प्रहार गरेका थिए । सातौँ होलको बोगी सामना गरेका उनले फ्रन्ट नाइन २–अन्डर ३२ स्कोर गरे । १०औँ होलमा इगल सामना गरेका उनले १२औँ र १८औँ होलको बर्डी प्रहार गरी ब्याक नाइनमा चार अन्डर ३० स्कोर गरे । दिनेशले फ्रन्ट नाइन एक अन्डर ३३ र ब्याक नाइन २–अन्डर ३२ मा सकाए ।
एमेच्योरतर्फ समग्रमा तीन ओभर दुई सय ७५ सहित राहुल विश्वकर्मा च्याम्पियन बनेका छन् । उनले निश्चयजंग रायमाझीलाई एक स्ट्रोकले हराउँदै उपाधि जितेका हुन् । समग्रमा चार ओभर दुई सय ७८ स्कोरसहित निश्चय दोस्रो भए । चार दिनसम्म चलेको प्रतियोगितामा ३६ प्रोफेसनल र ११ एमेच्योरले भाग लिएका थिए ।
