सुदूरपश्चिमका किरण ठगुन्नाले प्रधानमन्त्री एकदिवसीय क्रिकेट (पिएम) कपमा दोस्रो शतकीय इनिङ्स खेलेका छन् । किरणले आइतबार लहमीमा कोशी प्रदेशविरुद्ध ११५ रन बनाएका हुन् । उनकै शतकीय सहयोगमा सुदूरपश्चिमले कोशीलाई ३१ रनले हराएको छ । पहिलो ब्याटिङ गरेको सुदूरपश्चिमले ४३.४ ओभरमा सबै विकेट गुमाएर २४२ रनको योगफल खडा गरेको थियो । प्रत्युत्तरमा कोशी ४५.१ ओभरमा २११ रनमा समेटियो । किरणले यसअघि गण्डकी प्रदेशविरुद्ध १२१ रन बनाएका थिए । प्रतियोगितामा उनी व्यक्तिगत सर्वाधिक रन बनाउने सूचीको शीर्ष स्थानमा उक्लेका छन् ।
पिएम कपमा किरणले आठ इनिङ्समा ३३७ रन जोडेका छन् । त्रिभुवन आर्मी क्लबका तृतराज दास दोस्रो स्थानमा झरेका छन् । उनले आठ इनिङ्समा ३३३ रन जोडेका छन् । लुम्बिनीका प्रज्वल थापा २७० रनका साथ तेस्रो स्थानमा छन् । प्रतियोगितामा सुदूरपश्चिमको यो तेस्रो जित हो । ६ अंकका साथ सुदूरपश्चिम सातौँ स्थानमा छ । कोशी २ अंकका साथ नवौँ स्थानमा छ ।
कोशीविरुद्ध चम्के किरण
सुदूरपश्चिमले कोशीविरुद्ध गतिलो ब्याटिङ गर्न सकेन । किरणबाहेक अन्य कोही खेलाडी चल्न सकेनन् । छैटौँ क्रममा ब्याटिङ गर्न आएका किरणले ९१ बलमा १२ चौका र चार छक्का प्रहार गरी टोलीलाई मध्यम योगफलसम्म पु¥याएका थिए । उनी क्रिजमा आउँदा सुदूरपश्चिम ६५–५ को अवस्थामा थियो । कोशीले सुदूरपश्चिमलाई ३२ अतिरिक्त रन दिएको थियो । सुदूरपश्चिमका ओपनर टेक रावतले २२ बलमा १६ तथा कप्तान नारायण जोशीले २६ बलमा १४ रन जोडेका थिए । बलिङमा कोशीका ज्ञानेन्द्र श्रेष्ठले ४८ रन खर्चेर सर्वाधिक चार विकेट लिए । प्रत्युत्तरमा कोशीका लागि ओपनर सकिब हकले सर्वाधिक ६२ रनको योगदान दिए । उनले ६६ बलमा ११ चौका प्रहार गरेका थिए । कोशीका ऐस भट्टराईले ९० बल खेलेर ३६ रन बनाए ।
आर्मी १३१ रनले विजयी
प्रतियोगिताको ३५औँ खेलमा त्रिभुवन आर्मीले लुम्बिनी प्रदेशमाथि १३१ रनको फराकिलो जित निकाल्यो । सिद्धार्थनगरमा पहिलो ब्याटिङ गरेको आर्मीले ४९.२ ओभरमा सबै विकेट गुमाएर २४३ रन बनायो । प्रत्युत्तरमा लुम्बिनी २७.१ ओभरमा ११२ रनमा समेटियो । लुम्बिनीलाई सस्तैमा अलआउट गर्न सहाब आलमले सर्वाधिक चार विकेट लिए ।
