फिफा वरीयतामा ४८ स्थानमाथि रहेको म्यानमारविरुद्ध फोर नेसन्स कपको उपाधिका लागि नेपालले प्रतिस्पर्धा गर्दै
नेपाली महिला राष्ट्रिय फुटबल टोलीले बुधबार फोर नेसन्स कप च्याम्पियनसिपको उपाधि भिडन्तमा म्यानमारको सामना गर्दै छ । महिला टोलीको यो १३औँ अन्तर्राष्ट्रिय उपाधि भिडन्त हो । दशरथ रंगशालामा नेपालले आफूभन्दा फिफा वरीयतामा ४८ स्थानमाथि रहेको म्यानमारविरुद्ध आक्रामक रूपमा प्रस्तुत हुने अपेक्षा छ ।
राउन्ड रोबिन लिगमा यी टोलीहरू शीर्ष दुई स्थानमा रहँदै फाइनलको स्थान सुरक्षित गरेका हुन् । दुवैले समान सात अंक जोडे पनि गोलअन्तरमा म्यानमार शीर्ष स्थानमा रह्यो । राउन्ड रोबिन लिगको अन्तिम खेलमा नेपालले म्यानमारलाई २–२ को बराबरीमा रोकेको थियो । जस खेलमा स्ट्राइकर सावित्रा भण्डारीले अलराउन्ड खेल प्रस्तुत गरेकी थिइन् ।
फिफा डेमा आयोजना भइरहेको प्रतियोगितामा लेबनान र किर्गिस्तान लगातार दुई खेलमा पराजित हुँदै राउन्ड रोबिन लिगबाट बाहिरिएका थिए । नेपाल र म्यानमारबिच अन्तर्राष्ट्रिय फुटबलमा दोस्रोपटक उपाधि भिडन्तमा आमनेसामने हुन लागेको हो । सन् २०१९ मा भारतमा भएको हिरो महिला गोल्डकपको फाइनलमा म्यानमारले नेपालमाथि ३–१ को जित निकालेको थियो । फोर नेसन्सको राउन्ड रोबिन खेलमा म्यानमारले नेपालविरुद्ध पहिलो तथा दोस्रो रोजाईका खेलाडीलाई मैदानमा उतारेको थियो ।
तर, उपाधि भिडन्तमा भने म्यानमारले प्रमुख खेलाडीलाई खेलाउने सम्भावना छ । दशरथ रंगशालामा घरेलु मैदानमा समर्थकबिच म्यानमारलाई रोक्ने योजना नेपालको छ । यद्यपि, यो त्यति सहज देखिँदैन । नेपालका मुख्य प्रशिक्षक राजेन्द्र तामाङले दुई दिन रेस्टका कारण फाइनलको तयारी राम्रो भएको प्रतिक्रिया दिएका छन् । ‘हामीले फाइनलको तयारी राम्रो गरेका छौँ, अघिल्ला खेलमा भएका गल्ती सुधार गर्ने मौका पायौँ,’ तामाङले भने । नेपालकी कप्तान अन्जिला तुम्बापो सुब्बाले यसपटक नेपाल पहिलो हुनकै लागि प्रतिस्पर्धा गर्ने बताइन् । ‘घरमै आयोजना भइरहेको प्रतियोगिताको उपाधि रक्षा गर्ने योजना छ,’ उनले भनिन् ।
गत कात्तिकमा दशरथ रंगशालामै भएको साफ महिला च्याम्पिनसिपको फाइनलमा नेपालले बंगलादेशविरुद्ध प्रतिस्पर्धा गरेको थियो । नेपाल बंगलादेशसँग २–१ ले पराजित भयो । नेपालले लगातार १२औँ फाइनल गुमायो । महिला टोली उपाधि भिडन्तमा चुकिरहेको छ । यसपटक फाइनलमा व्यहोरिरहेको हारको ‘जिंक’ तोड्ने विश्वास छ । यद्यपि, नेपालले अहिलेसम्म म्यानमारविरुद्ध जित निकाल्न सकेको छैन ।
