ताप्लेजुङमा सात हजारभन्दा बढीलाई पाठेघरको मुखको क्यान्सरविरुद्ध खोप लागाइने

ताप्लेजुङमा सात हजार १७८ बालिकालाई पाठेघरको मुखको क्यान्सरविरुद्धको खोप लगाइने भएको छ। राष्ट्रिय खोप अभियानअन्तर्गत ताप्लेजुङमा विद्यालयभित्रका पाँच हजार ९५४ र विद्यालयबाहिरका एक हजार १६४ जनालाई सो खोप लगाइनेछ।

स्वास्थ्य कार्यालय ताप्लेजुङका कोल्ड चेन अधिकृत दिनेश रायका अनुसार जिल्लाका नाै स्थानीय तहका माध्यमिक तथा निम्नमाध्यमिक विद्यालयका कक्षा ६ देखि १० सम्मका छात्राहरूलाई खोप लगाइनेछ।

माघ २२ देखि २६ गतेसम्म पहिलो चरणमा फुङलिङ नगरपालिका, पाथीभरा यङ्वारक, सिदिङ्वा र सिरिजंघा गाउँपालिकामा खोप अभियान सञ्चालन  गरिनेछ। दोस्राे चरणमा माघ २८ देखि फागुन ३ गतेसम्म आठराई त्रिवेणी, मैवाखोला, मेरिङदेन, मिक्वाखोला र फक्ताङलुङ गाउँपालिकामा खोप अभियान सञ्चालन गर्न तयारी पूरा भएको अधिकृत रायले बताए।

खोप अभियानका लागि १४० विद्यालयसहित २२३ वटा खोप केन्द्र रहनेछ। अभियानका क्रममा २२३ खोप स्वास्थ्यकर्मी, ४४६ स्वयंसेवक र ८१ सुपरिवेक्षक खटाइनेछ।