दुई दशकअघि बिहे गरेकी छिन्नमस्ता गाउँपालिका– ३ की मिरादेवी मण्डलले अंगीकृत नागरिकता प्राप्त गरेकी छिन् । छिन्नमस्ता गाउँपालिका अध्यक्ष विद्यानन्द चौधरीले सनाखत गरेपछि बुधबार जिल्ला प्रशासन कार्यालय सप्तरीले उनलाई नागरिकता दिएको हो । सप्तरीका प्रमुख जिल्ला अधिकारी मेखबहादुर मगरातीले उनलाई नागरिकता प्रमाणपत्र प्रदान गरे । मिराको माइती भारत बिहार राज्यको मधुवनी जिल्लाको ग्राम पञ्चायत महथौर खुर्द प्रखण्ड फुलपरास हो ।
बिहेको चार वर्षपछि श्रीमान् रामलखन मण्डल हराएपछि उनले नागरिकता पाउन सकेकी थिइनन् । यसबीचमा उनी पटक–पटक सरकारी अड्डा नधाएकी होइनन् । अदालतले समेत उनलाई नागरिकता दिन परमादेश दिएको थियो । तैपनि नागरिकता प्राप्त गर्न नसकेको पालिका अध्यक्ष चौधरीले बताए ।
‘बिहे भएको चार वर्षमै श्रीमान् सम्पर्कविहीन भएपछि मिरादेवी नेपाली नागरिकता पाउनबाट वञ्चित हुनुभयो । नागरिकताका लागि यसबीचमा पटक–पटक जिल्ला प्रशासन कार्यालय सप्तरी धाउनुभएकी उहाँले थाकेर आस मार्नुभएको थियो,’ अध्यक्ष चौधरीले भने, ‘अदालतको परमादेशले पनि काम गरेन । म उहाँलाई चिन्दछु । यो सबै घटना थाहा भएपछि म आफैँले सनाखत गरेँ र २२ वर्षपछि उहाँले नागरिकता पाउनुभयो ।’ मिराको १८ वर्षीय छोरा र १६ वर्षीया छोरी छन् । आमाले नागरिकता पाएपछि अब छोराछोरीको पनि नागरिकता लिने बाटो खुलेको अध्यक्ष चौधरीले बताए ।
वर्षौँको दौडधुपपछि नागरिकता पाएकी मिरा प्रसन्न देखिएकी छन् । आफू नेपाली नागरिक भएपछि छोराछोरीको भविष्य पनि सुरक्षित भएको उनले बताइन् । ‘धेरै खुसी छु । मलाई नागरिकता दिन पहल गर्नुहुने पालिका अध्यक्षज्यूलाई आभार प्रकट गर्न चाहन्छु,’ मिराले भनिन्, ‘हरेस खाइसकेकी थिएँ, नागरिकता पाउँछु भने आस थिएन । आफूभन्दा पनि छोराछोरीको भविष्य नागरिकताविना अन्योल देखिरहेको थिएँ ।’