काठमाडौंको ठमेलस्थित एक होटेलबाट कोकिनसहित दुई ब्राजिलियन नागरिक पक्राउ परेका छन् । एक किलो चार सय ५५ ग्राम कोकिनसहित ब्राजिलियन नागरिक लारिसन ब्रिटो डोस सानटोस र फर्नान्डा भेल डोस सानटोस पक्राउ परेका हुन् ।
लागुऔषध नियन्त्रण ब्युरो कोटेश्वरबाट खटिएको प्रहरीले उनीहरूलाई मंगलबार पक्राउ गरी शुक्रबार सार्वजनिक गरेको हो । लारिसनलाई आठ सय ४० ग्राम र फर्नान्डालाई पाँच सय ५० ग्राम अवैध लागुऔषध कोकिनसहित पक्राउ गरिएको ब्युरोले जनाएको छ । अनुसन्धानका क्रममा दुवैले कोकिनका क्याप्सुलहरू निलेर पेटभित्र लुकाई ब्राजिलको सापाउलोबाट नेपाल ल्याएको खुलेको प्रहरीले जनाएको छ । होटेलमा बसेर दिसामार्फत ती कोकिन निकाल्दै गर्दा छापा हानी प्रहरीले उनीहरूलाई पक्राउ गरेको हो ।
पक्राउ परेपछि उनीहरूको पेटमा थप क्याप्सुल हुन सक्ने देखिएपछि दुवैजनालाई नेपाल प्रहरी अस्पताल पठाइएकोमा लारिसनको पेटबाट थप ६ वटा प्लास्टिकले र्यापिङ गरिएका क्याप्सुलभित्र कोकिन ६५ ग्राम बरामद भएको थियो । बरामद गरिएको लागुऔषध कोकिनको अवैध बजार मूल्य चार करोड ३६ लाख ५० हजार रुपैयाँ रहेको ब्युरोले जनाएको छ ।
ब्युरोका प्रमुख एसएसपी गोविन्द थपलियाका अनुसार उनीहरू २३ मार्चमा ब्राजिलबाट उडेकोमा २५ मार्चमा नेपाल आएका थिए । शंका लागेर ब्युरोको टोलीले अन्तर्राष्ट्रिय विमानस्थलबाटै उनीहरूलाई पछ्याएको थियो । विमानस्थलबाट ठमेल जाने क्रममा ट्याक्सीमै पुरानो होटेल बुकिङ रद्द गरेर नयाँ होटेलमा बुक गरेका थिए ।
घुम्न आएको बताउने उनीहरू होटेलबाट मेडिकलमा गमलगायत केही औषधि किन्न जानेबाहेक अन्यत्र निस्किएका थिएनन् । दुई दिनपछि छापा हानेर पक्राउ गर्दा कोकिन बरामद भएको एसएसपी थपलिया बताउँछन् । तर, उनीहरूले कसलाई सो कोकिन दिन ल्याएको थिए भन्ने विषयमा अझै खुल्न सकेको छैन । प्रारम्भिक अनुसन्धानमा उनीहरू कोकिन बोक्ने भरिया मात्र भएको प्रहरी आकलन छ ।
नेपालमा ब्राजिललगायत दक्षिण अमेरिकी देशबाट कोकिन आउने अपराधको प्रवृत्ति नयाँ नभएको प्रहरी अधिकारी बताउँछन् । विगतमा पनि पटक–पटक यसरी कोकिन आएको छ । नेपालललाई ट्रान्जिट बनाएर अर्काे देश लैजान यहाँ ल्याउने प्रवृत्ति छ । तुलनात्मक रूपमा नेपालम यस्तो अपराधमा कम सजाय हुने र विमानस्थलमा स्क्रिनिङ बलियो नभएको आकलनका आधारमा अन्तर्राष्ट्रिय गिरोहले नेपाललाई ट्रान्जिट बनाउँदै आएको छ । यसरी आउने कोकिन भारत तथा युरोपियन देशमा पुग्न गरेको छ ।
पक्राउ परेका दुई ब्राजिलियन भरिया कि तस्कर ?
लागुऔषध नियन्त्रण ब्युरोका प्रमुख एसएसपी गोविन्द थपलियाका अनुसार ब्राजिलियन नागरिक लारिसन ब्रिटो डोस सानटोस र फर्नान्डा भेल डोस सानटोस २३ मार्चमा ब्राजिलबाट उडेकोमा २५ मार्चमा नेपाल आएका थिए । शंका लागेर ब्युरोको टोलीले अन्तर्राष्ट्रिय विमानस्थलबाटै उनीहरूलाई पछ्याएको थियो । विमानस्थलबाट ठमेल जाने क्रममा ट्याक्सीमै पुरानो होटेल बुकिङ रद्द गरेर नयाँ होटेल बुक गरेका थिए ।
घुम्न आएको बताउने उनीहरू होटेलबाट मेडिकलमा गमलगायत केही औषधि किन्न जानेबाहेक अन्यत्र निस्किएका थिएनन् । दुई दिनपछि छापा हानेर पक्राउ गर्दा कोकिन बरामद भएको एसएसपी थपलिया बताउँछन् । तर, उनीहरूले कसलाई सो कोकिन दिन ल्याएका थिए भन्ने विषयमा अझै खुल्न सकेको छैन । प्रारम्भिक अनुसन्धानमा उनीहरू कोकिन बोक्ने भरिया मात्र भएको प्रहरी आकलन छ ।
