हङकङमा चलिरहेको त्रिकोणात्मक अन्तर्राष्ट्रिय टी–२० क्रिकेट प्रतियोगिताको उपाधिका लागि नेपाल र पपुवा न्युगिनीबीच प्रतिस्पर्धा हुने भएको छ । प्रतियोतिगाअन्तर्गत मंगलबार दुई खेल भए । पहिलो खेलमा नेपालले पपुवा न्युगिनीमाथि ८५ रनको सानदार जित निकालेको थियो । दोस्रो खेलमा पपुवा न्युगिनीले आयोजक हङकङलाई १० विकेटको निराश पार्दै फाइनल स्थान पक्का गरेको हो ।
नेपालले सर्वाधिक तीन अंक बटुल्यो । अन्तिम दुई स्थान बनाएको पपुवा न्युगिनीले दुई अंक जोड्यो । हङकङ एक अंकका साथ तेस्रो भयो । अब हङकङले तेस्रो स्थानका लागि हङकङ ‘ए’विरुद्ध खेल्नेछ । पपुवा न्युगिनीमाथि सानदार जित निकाल्ने क्रममा म्यान अफ दी म्याच कुशल भुर्तेलले अलराउन्ड प्रदर्शन गरे । उनले ब्याटिङको क्रममा ३९ बलमा ५९ रन तथा बलिङमा १२ रन खर्चेर चार विकेट हात पारे । यसै खेलबाट कुशलले अन्तर्राष्ट्रिय टी–२० खेलमा एक हजार रन पूरा गरेका छन् ।
पहिलो ब्याटिङ गरेको नेपालले २० ओभरमा ६ विकेट गुमाएर एक सय ९८ रनको बलियो योगफल बनाएको थियो । प्रत्युत्तरमा पपुवा न्युगिनीका खेलाडीले कुशलको घातक बलिङ सामना गर्न नसक्दा १६.१ ओभरमा सबै विकेट गुमाएर एक सय १३ रनको योगफल खडा गरेको थियो ।
कमजोर पपुवा न्युगिनी
लक्ष्य पछ्याएको पपुवा न्युगिनीले नेपाली बलरविरुद्ध गतिलो प्रदर्शन गर्न सकेनन् । विशेषतः भुर्तेलले आफ्नो स्पेलमा विकेट लिँदै गएपछि पपुवा न्युगिनी ब्याटिङमा कमजोर देखिएको हो । ओपनर टोनी उरा र सेसे बाउले पहिलो विकेटका लागि २.६ ओभरमा ३२ रनको उत्कृष्ट साझेदारी गरेका थिए । प्रतिष जिसीले टोनीको विकेट लिएसँगै नेपालले खेलमा पकड बनायो । सिसे पनि ३.२ ओभरमा गुल्सनबाट रन आउट भए । उनले १३ बलमा दुई चौका र एक छक्का प्रहार गरी २१ रन जोडे । त्यसपछि हिरीले मात्र १९ बलमा २८ रन बनाए । पपुवा न्युगिनीका सात ब्याट्सम्यानले दोहोरो रन नै बनाएनन् । भुर्तेलबाहेक नेपालका लागि प्रतिषले चार ओभरमा ४० रन खर्चेर दुई विकेट हात पारे । आकाश चन्द र गुल्सनले समान एक विकेट हात पारे ।
भुर्तेलले पूरा गरे हजार रन
नेपालका ओपनर भुर्तेलले अन्तर्राष्ट्रिय टी–२० खेलमा एक हजार रन पूरा गरेका छन् । सन् २०२१ मा नेदरल्यान्ड्सविरुद्ध त्रिवि क्रिकेट मैदानमा उनले यस फम्र्याटमा डेब्यु गरेका थिए । डेब्युयता निरन्तर रूपमा राष्ट्रिय टोलीमा स्थान बनाएका भुर्तेलले अन्तर्राष्ट्रिय टी–२० को फम्र्याटमा ३६ खेलमा ३५ इनिङ्स खेल्दै एक हजार आठ रन जोड्न सफल भएका छन् । उनले यसक्रममा आठपटक अर्धशतक तथा एकपटक शतकीय इनिङ्स खेलेका छन् ।
उनको सर्वाधिक व्यक्तिगत रन १०८ हो । उनले टी–२० खेलमा ४४ चौका र २३ छक्का प्रहार गरेका छन् । यस फम्र्याटमा उनले एक सय ३२.८० को स्ट्राइकमा ब्याटिङ गरेका छन् । भुर्तेललले पपुवा न्युगिनीविरुद्ध विस्फोटक ब्याटिङ गरे । उनले चार चौका र चारै छक्का प्रहार गरे । नेपालबाट अन्तर्राष्ट्रिय टी–२० खेलमा एक हजार रन पूरा गर्ने उनी दोस्रा खेलाडी हुन् । यसअघि मध्यक्रमका ब्याट्सम्यान दीपेन्द्रसिंह ऐरीले पूरा गरेका थिए । दीपेन्द्रले ५८ खेलमा एक जहार चार सय ७६ रन बनाएका छन् । उनले एक शतक तथा आठ अर्धशतक बनाएका छन् ।
पपुवा न्युगिनीविरुद्ध बलियो ब्याटिङ
नेपाली खेलाडीले पपुवा न्युगिनीविरुद्ध दरिलो ब्याटिङ प्रस्तुत गरेको थियो । पहिलो ब्याटिङ गरेको नेपालका लागि भुर्तेल र विनोद भण्डारीबीच पहिलो विकेटका लागि ७.३ ओभरमा ६४ रनको साझेदार भयो । भण्डारीले २२ बलमा दुई चौका र एक छक्का प्रहार गरी २७ रनको योगदान दिए ।
ओपनिङ राम्रो भएको नेपालको मध्यक्रम एक समय कमजोर देखियो । कप्तान रोहितकुमार पौडेलले चार बल साना गरी एक रन तथा आरिफ सेखले सात बलमा चार रन जोडे । दुवै ब्याट्सम्यान पाँच रनको अन्तरमा पेभेलियन फर्कँदा नेपाल ९.३ ओभरमा ७०÷३ को स्थितिमा रह्यो । त्यसपछि भुर्तेल र सन्दीप जोराले ब्याटिङ इनिङ्स सम्हाले । दुवैले चौथो विकेटका लागि ५० रनको साझेदारी गर्दै नेपाललाई १४.३ ओभरमा १२०÷४ को बलियो स्थितिमा राखे ।
भुर्तेल भानुआको ओभरमा क्याच आउट भए । सन्दीप १७.५ ओभरमा आउट भए । उनले २६ बलमा ५७ रनको उत्कृष्ट योगदान दिए । उनले यसक्रममा चार छक्का र तीन चौका प्रहार गरे । उनको यो दोस्रो टी–२० अर्धशतक हो । गुल्सन झा र सन्दीपले पाँचौँ विकेटका लागि ४० रनको साझेदारी गरेका थिए ।
गुल्सनले १२ बलमा एक छक्काको सहयोगमा १५ रन बनाए । लोकेश बम र विवेक यादवले पुछारमा आक्रामक ब्याटिङ गरे । लोकेशले ६ बलमा दुई छक्काको मद्दतमा १४ रन तथा विवेकले चार बलमा तीन छक्काको सहयोगमा १९ रन बनाए । नेपालले पपुवा न्युगिनीबाट तीन रन मात्र अतिरिक्त पाएको थियो ।
