शिक्षा विधेयक शिक्षकले नै जलाए

शुक्रबार, २९ भदौ, २०८०
डिजिटल संस्करण
शिक्षा विधेयक शिक्षकले नै जलाए

धादिङको नीलकण्ठ नगरपालिका–३ बिचबजारमा नेपाल शिक्षक संघ धादिङ निकट शिक्षकहरु प्रस्तावित शिक्षा विधेयक २०८० जलाउँदै । तस्विर : अर्जुन श्रेष्ठ/नयाँ पत्रिका

संघीय संसदमा पेस भएको शिक्षा विधेयक शिक्षकहरूको हकहितविपरीत भएको भन्दै शिक्षकहरूले नै जलाएका छन् । संसदमा दर्ता भएको ‘विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक २०८०’ नेपाल शिक्षक संघ धादिङनिकट शिक्षकहरूले जलाएका हुन् ।  

जिल्ला सदरमुकाम धादिङबेँसी बीचबजारमा शिक्षकहरू जम्मा भई नयाँ शिक्षा विधेयकको विरोध गरेका छन् । ०२८ सालमा आएको शिक्षा ऐनभन्दा पनि प्रतिगामी भएको भन्दै प्रस्तावित शिक्षा विधेयक फिर्ता गर्न माग राख्दै विधेयक जलाइएको छ ।

सरकार, सांसद, विभिन्न दलहरूसँग पटक–पटक छलफल र कुराकानी भए पनि शिक्षकमैत्री विधेयक आउने आश्वासन मात्रै दिएको नेपाल शिक्षक संघ धादिङका अध्यक्ष देवीप्रसाद छत्कुलीले बताए । 

‘सरकारसँग ५१ र ३० बुँदे सम्झौता गरेका थियौँ । तर, सम्झौता गरिएका ती मागहरू ऐनमा आएनन्, पुरानै ऐन एता–उता गरेर ल्याइएको छ । जुन शिक्षकको हकहितविपरीत छ,’ उनले भने, ‘विधेयकले शिक्षकले पाउनुपर्ने सेवा–सुविधाबाट समेत बञ्चित गरेको छ ।’ 

‘सार्वजनिक शिक्षालाई महँगो बनाएको छ,’ उनले भने, ‘शिक्षक हुन स्नातक अध्ययन गरेको हुनुपर्ने, तर पुरानै सेवा सुविधा छ । नयाँ विधेयकमा शिक्षकको अधिकार, ट्रेड युनियन अधिकारहरू वञ्चित छन् । यस्ता थुप्रै बुँदाहरू हेरफेर हुनुपर्छ । यस्तो विधेयक हामी मान्दैनौँ ।’ 

‘यो सांकेतिक आन्दोलन हो । माग पूरा नभए विद्यालय बन्द गरेर शिक्षकहरू सडकमा आउँछन् । सरकारले हाम्रो माग पुरा गर्नुपर्छ । अन्यथा विद्यालय बन्द गरेर हामी सडकमा आउन बाध्य हुनेछौँ । यसको क्षति र जिम्मेवारी सरकारले लिनुपर्छ,’ अध्यक्ष छत्कुलीले भने । 

सुझावित समाचार