५५औँ एसियन शारीरिक सुगठन तथा फिजिक्स स्पोर्टस् च्याम्पियनसिपमा १० प्रतिस्पर्धीलाई हराउँदै सराभन ओभरल च्याम्पियन बने
भारतका सराभनले मनी मिस्टर एसियाको उपाधि जितेका छन् । ५५औँ एसियन शारीरिक सुगठन तथा फिजिक्स स्पोर्टस् च्याम्पियनसिप ओभरल च्याम्पियन हुँदै उनले उपाधि जितेका हुन् । उनले आफ्ना १० प्रतिस्पर्धीलाई पछि पार्दै उपाधि जितेका हुन् । शारीरिक सुगठनतर्फ विभिन्न १० तौलसमूहका विजेताबीच मिस्टर एसियाको प्रतिस्पर्धा भएको थियो । सराभन ९० केजी तौलसमूहमा विजयी हुँदै ओभरअल राउन्डमा प्रवेश गरेका थिए ।
नेपाल शारीरिक सुगठन तथा फिटनेस महासंघको व्यवस्थापनमा भएको स्पर्धामा पुरुषतर्फ नेपालले कुल २६० अंक हासिल गर्दै टिम च्याम्पियनसिपमा तेस्रो स्थान हात पार्यो । भारत ७९५ अंकका साथ पुरुषतर्फ पहिलो भयो । दोस्रो भएको थाइल्यान्डले ५९० अंक जोड्यो । महिलातर्फ थाइल्यान्डले टिम च्याम्पियनसिपको उपाधि जित्यो । दोस्रो स्थानमा भियतनाम र तेस्रो स्थानमा हङकङ चाइना रहेको आयोजकले जनाएको छ । नेपालले यस च्याम्पियनसिपमा ३ स्वर्ण, ६ रजत र ५ कांस्य पदक हात पारेको छ ।
च्याम्पियनसिपमा १७ राष्ट्रका १६८ पुरुष र ६८ महिला गरी २३६ खेलाडीले ४५ विधामा प्रतिस्पर्धा गरेका थिए । शारीरिक सुगठनको पहिलो ठूलो प्रतियोगिताको रूपमा रहेको च्याम्पियनसिपमा नेपालसहित भुटान, चीन, हङकङ चाइना, भारत, काजाखस्तान, मकाउ चाइना, माल्दिभ्स, मलेसिया, म्यानमार, सिंगापुर, दक्षिण कोरिया, श्रीलंका, थाइल्यान्ड, ताजाकिस्तान, उज्वेकिस्तान र भियतनामको सहभागिता थियो । च्याम्पियनसिपमा पुरुषतर्फ २८, महिलातर्फ १६ र मिक्स एक गरी ४५ विधामा प्रतिस्पर्धा भएको थियो ।
प्रतियोगिताअन्तर्गत पुरुष एथलेट फिजिक १८२ सेमिमा नेपालका विप्लभ कार्कीले कांस्य हात पारे । यस विधामा भारतका रामा सोमाशेखरले स्वर्ण र भुटानका टान्डिन वाङचेनले रजत प्राप्त गरे । विशाल पौडेलले जुनियर शारीरिक सुगठन, सनम मुलगुठीले स्विमसुट विधा र रजनी श्रेष्ठले ५५ केजी शारीरिक सुगठनमा स्वर्ण जिते । सुरेश दुवाल ५५ केजी, असीमबाबु गुरुङ ६० केजी, मनोज सुवेदी ६५ केजी, ललित धिमाल ७५ केजी, राजु राई फिटनेस फिजिक विधा, तारा खैजु मोडल फिजिक्सले रजत पदक हात पारे । कमल भण्डारी ६० केजी, कृष्णप्रसाद श्रेष्ठ ८० केजी, रञ्जित लामा फिटनेस फिजिक्स, बिप्लभ कार्की एथलेटिक्स फिजिक, निहालमान जोशीले एथलेटिक्स फिजिकमा कांस्य जितेका छन् ।
