न्याय सेवामा प्रवेश गरेको ४० वर्षमा प्रधानन्यायाधीश बन्ने अवसर, १९ महिना रहनेछन् पदमा
कैलाली धनगढीका विश्वम्भर श्रेष्ठले ०४१ पुसदेखि न्याय सेवामा प्रवेश पाएका थिए । न्याय क्षेत्रमा ४० वर्षको अनुभव सँगालेका उनी न्यायिक निकायकै सर्वोच्च पद प्रधानन्यायाधीश बन्दै छन् । २० असोज ०१६ जन्ममिति रहेका उनी उमेरहदका कारण २० असोज ०८१ सम्म अर्थात् १९ महिना प्रधानन्यायाधीश पदमा रहन पाउनेछन् ।
संवैधानिक परिषद्ले सर्वाेच्च अदालतको प्रधानन्यायाधीशमा वरिष्ठतम न्यायाधीश विश्वम्भरप्रसाद श्रेष्ठको नाम सिफारिस गरेको छ । बिहीबार सिंहदरबारमा बसेको परिषद् बैठकले शनिबार (२० साउन)बाट रिक्त हुने प्रधानन्यायाधीश पदमा श्रेष्ठलाई सिफारिस गर्ने निर्णय गरेको हो ।
संविधानको धारा १२९ (३) मा सर्वोच्चको न्यायाधीश पदमा कम्तीमा तीन वर्ष कार्यरत व्यक्ति प्रधानन्यायाधीश पदका लागि योग्य हुने उल्लेख छ । यसअनुसार श्रेष्ठका साथै ईश्वरप्रसाद खतिवडा, आनन्दमोहन भट्टराई, अनिलकुमार सिन्हा, प्रकाशमानसिंह राउत, सपना प्रधान मल्ल, प्रकाशकुमार ढुंगाना, सुष्मालता माथेमा, कुमार रेग्मी, हरिप्रसाद फुँयाल र मनोजकुमार शर्मा योग्य थिए । तर, वरिष्ठतमलाई प्रधानन्यायाधीश पदमा नियुक्त गर्ने अभ्यासअनुसार श्रेष्ठलाई सिफारिस गरिएको हो ।
परिषद् सदस्य एवं राष्ट्रिय सभा अध्यक्ष गणेशप्रसाद तिमिल्सिनाले प्रधानन्यायाधीशमा श्रेष्ठलाई सिफारिस गरिएको तथा रिक्त रहेका अन्य संवैधानिक पदमा पदपूर्तिको प्रक्रिया पनि अघि बढाउने निर्णय भएको बताए । ११ असोज ०७९ बाट कायममुकायम प्रधानन्यायाधीश बनेका वर्तमान प्रधानन्यायाधीश हरिकृष्ण कार्की ६५ वर्षे उमेरहदका कारण शनिबारदेखि अनिवार्य अवकाशमा जाँदै छन् ।
बैठकमा प्रधानन्यायाधीश कार्कीले वरिष्ठताका आधारमा प्रधानन्यायाधीश सिफारिस हुने गरेको प्रचलन सुनाएका थिए । यसमा नेपाल र भारतको अभ्याससमेत प्रस्तुत गरेका थिए । त्यसपछि उनको नाम सिफारिस गर्ने निर्णय भएको थियो । उपसभामुख इन्दिरा रानाले वरिष्ठताका आधारमा अबको प्रधानन्यायाधीशमा श्रेष्ठलाई सिफारिस गरिएको बताइन् ।
श्रेष्ठ संसदीय सुनुवाइबाट अनुमोदन भएपछि राष्ट्रपतिबाट नियुक्त हुनेछन् । त्यसअगाडि संसदीय सुनुवाइ समितिले श्रेष्ठविरुद्ध उजुरी आह्वान तथा उजुरीकर्तासँग छलफल गर्नेछ । त्यसपछि मात्रै सुनुवाइ गर्नेछ । नियुक्त भएपछि श्रेष्ठ ०८१ असोजसम्म प्रधानन्यायाधीश रहनेछन् ।
राष्ट्रिय सभा अध्यक्ष तिमिल्सिनाले महालेखापरीक्षक, निर्वाचन आयुक्त, प्राकृतिक स्रोत तथा वृत्त आयोगको सदस्य र मुस्लिम आयोगको सदस्यका लागि १५ दिने सूचना जारी गरेर आवेदन माग गर्ने निर्णय भएको बताए । ‘इच्छुकहरूलाई आवेदन दिन १५ दिनको सूचना जारी गर्ने निर्णय भएको छ । त्यसपछि नियुक्ति प्रक्रिया अगाडि बढ्छ,’ तिमिल्सिनाले भने ।
यी संवैधानिक अंगको पदपूर्तिमा महिलाको उपस्थिति हुनुपर्ने उपसभामुख रानाको प्रस्ताव छ । उनको प्रस्तावमा सबै सदस्यले सहमति जनाएका छन् ।
न्याय सेवामा प्रवेश गरेको ४० वर्षमा प्रधानन्यायाधीश बन्ने अवसर, १९ महिना रहनेछन् पदमा
कैलाली धनगढीका विश्वम्भर श्रेष्ठले ०४१ पुसदेखि न्याय सेवामा प्रवेश पाएका थिए । न्याय क्षेत्रमा ४० वर्षको अनुभव सँगालेका उनी न्यायिक निकायकै सर्वोच्च पद प्रधानन्यायाधीश बन्दै छन् ।
३ जेठ ०४५ मा पहिलोपटक जिल्ला न्यायाधीश नियुक्त भएका उनले दार्चुला जिल्ला अदालतमा सेवा दिए । त्यसपछि डडेल्धुरा, उदयपुर, मकवानपुर, झापासमेतका जिल्ला अदालतमा कार्यरत रहे ।
१० चैत ०६२ मा पुनरावेदन अदालत बाग्लुङमा नियुक्ति पाएका उनी ०७३ साउनमा सर्वोच्च अदालतको न्यायाधीश बनेका थिए । उनी क्याडरबाट अर्थात् तल्ला तहका अदालतमा न्यायाधीश हुँदै सर्वोच्च प्रवेश गरेका हुन् । २० असोज ०१६ जन्ममिति रहेका उनी उमेरहदका कारण २० असोज ०८१ सम्म अर्थात् १९ महिना प्रधानन्यायाधीश पदमा रहन पाउनेछन् ।
