सावित्रा भण्डारीले अन्तिम इन्जुरी समयमा गोल गरेपछि नेपालले बंगलादेशलाई पहिलो मैत्रीपूर्ण फुटबल प्रतियोगितामा १–१ को बराबरीमा रोकेको छ । ढाकास्थित कमल रंगशालामा बिहीबार बंगलादेशले १–० को अग्रता रक्षा गर्न नसक्दा नेपालसँग बराबरी खेल्न बाध्य भयो । आइतबार दोस्रो खेल हुनेछ । खेलको ६५औँ मिनेटमा बंगलादेशले १–० को अग्रता लियो ।
मिडफिल्डर सरु लिम्बूले बल फुत्काएपछि बंगलादेशकी कप्तान सविना खातुनले सहजै बक्सभित्रबाट अग्रता गोल गरिन् । एक गोलले पछि परेपछि नेपाल दबाबमा देखियो । प्रशिक्षक अनन्तराज थापाले कप्तान रेनुका नगरोटीको स्थानमा अनिता केसीलाई मैदान प्रवेश गराएपछि नेपालले खेलमा सुधार ल्यायो । नेपाल निर्धारित ९० मिनेटसम्म १–० ले पछि नै थियो । लगभग नेपाल हारतर्फ उन्मुख भइसकेको थियो । खेलको अन्तिम चार मिनेटको इन्जुरी समयमा सावित्राले बराबरी गोल फर्काइन् ।
बंगलादेशको कमजोर रक्षापंक्तिको फाइदामा सावित्राले रेखा पौडेलको पासमा गोल गरेकी हुन् । यसअघि रेनुका बाहिरिएपछि एन्जिला तुम्बाप्पो सुब्बाले कार्यवाहक कप्तानीको ‘आर्म ब्यान्ड’ लगाएकी थिइन् । दोस्रो हाफमा रश्मिकुमारी घिसिङ र रेखाले सावित्रासँगै नेपालको अग्रपंक्ति सम्हालेका हुन् ।
आक्रमणमा नेपाल बलियो
नेपाल बंगलादेशविरुद्ध पूरै समय आक्रामक रूपमा रह्यो । गत असारमा काठमाडौंमा भएको साफ महिला च्याम्पियनसिपको फाइनलमा नेपाल बंगलादेशसँग १–० ले पराजित भएको थियो । पहिलो मैत्रीपूर्ण खेलको ५६औँ मिनेटमा सावित्राले बक्सभित्रबाट प्रहार गरेको बललाई बंगाली रक्षकले क्लियर गरिन् । खेलको ७३औँ मिनेटमा नेपालले सुनौलो अवसर गुमाएको थियो ।
सावित्राको पासमा रश्मिले बक्सभित्रबाट प्रहार गरेको बललाई बंगाली गोलकिपर चक्माले उत्कृष्ट बचाउ गरेकी थिइन् । खेलको ७५औँ मिनेटमा बंगलादेशले दोस्रो गोल गर्ने अवसर गुमायो । सविनाले वान भर्सेस वानको अवस्थामा प्रहार गरेको बललाई नेपालकी गोलरक्षक एन्जिलाले उत्कृष्ट बचाउ गरेकी थिइन् ।
