निर्माणाधीन काठमाडौं दृश्यावलोकन स्तम्भ (भ्यु टावर)मा १२ देखि १४ तला थप्ने तयारी भएको छ । साबिक पुरानो बसपार्कमा रहेको टावरको १२ तला सम्पन्न भइसकेको छ । १२औँ तला निर्माणबारे प्राविधिक जाँचका लागि पुल्चोक इन्जिनियरिङ क्याम्पसले अध्ययन गरी काठमाडौं महानगरलाई प्रतिवेदन बुझाइसकेको छ । प्रतिवेदनअनुसार निर्माण मापदण्डअनुसार नै काम भएको र अझै तला थप्न सकिने जनाएकाले कामपाको प्राविधिक टोलीले उक्त प्रतिवेदनको अध्ययन गरी तला थपका लागि अनुमति दिने तयारी गरेको छ ।
०७२ सालको भूकम्पअघि उक्त टावर २९ तलाको बनाउने तयारी थियो । भूकम्पपछि १२ तलामा सीमित गरिएको थियो । अहिले १२ तलालाई बढाएर २४ देखि २६ तलासम्म बनाउने तयारी भइरहेको कामपा सार्वजनिक निजी साझेदारी एकाइका प्रमुख महेश काफ्लेले जानकारी दिए । उनका अनुसार कामपाको प्राविधिक टोलीले प्रतिवेदन अध्ययन गरेपछि कति तला थप्नेबारे यकिन हुनेछ ।
टावर निर्माण गरिरहेको कम्पनीले तला थपका लागि कामपालाई निवेदन दिनुपर्छ । सोहीअनुसार कामपाले कानुनी प्रक्रिया पूरा गरी तला थपका लागि नक्सा स्वीकृत गर्नेछ । प्रमुख काफ्लेका अनुसार भूकम्प जानुअघि २९ तला नै बनाउने योजना थियो, भूकम्प गएसँगै १२ तला बनाउने भन्दै सोहीअनुसार निर्माण अघि बढाइएको हो । ‘हालसम्म निर्माण भएको संरचना कस्तो छ, निर्माण सामग्री कस्तो प्रयोग गरिएको छ, तला थप्न मिल्छ कि मिल्दैनजस्ता विषयबारे पुल्चोक क्याम्पसले अभ्ययन गरेहो हो,’ काफ्लेले भने ।
टावर निर्माणको काम जलेश्वर, स्वच्छन्द र बिकोईले ०७३ साउनदेखि सुरु गरेको हो । टावर निर्माणका लागि कामपा र जलेश्वर, स्वच्छन्द र बिकोई कम्पनीबीच २२ फागुन ०७१ मा सम्झौता भएको थियो । सम्झौताअनुसार पाँच वर्षभित्र कम्पनीले आफ्नो लगानीमा भवन बनाएर ३० वर्षसम्म भोगचलन गर्न सक्नेछ । टावरका लागि २३ रोपनी पाँच आना जग्गा छुट्याइएको छ । उक्त टावर नेपाली कला संस्कृति झल्किने किसिमको हुने उल्लेख छ ।
कुल क्षेत्रफलको ४० प्रतिशत भूभागमा टावर बन्नेछ भने ६० प्रतिशत भाग खाली हुनेछ । ६० प्रतिशत जग्गामा बगैँचा, बस्ने ठाउँ तथा विभिन्न मनोरञ्जनका सामग्री राखिने योजना छ । टावरमा दुईतले भूमिगत पार्किङ हुनेछ । जसमा चार सयवटा सवारीसाधन अटाउनेछन् । भुइँतलामा मोटरसाइकल पार्किङ रहनेछ । टावरमा अत्याधुनिक सिनेमा हल, बैंक तथा वित्तीय संस्था, स्वास्थ्य सेवा प्रवाह गर्ने स्थान, रेस्टुरेन्ट तथा पुस्तकालय हुनेछन् ।
वैशाखदेखि पार्किङ खुला
निर्माणाधीन भ्यु टावरको बेसमेन्ट (भूमिगत क्षेत्र)मा गत २२ वैशाखदेखि निजी सवारीसाधन पार्किङका लागि खुलेको छ । चारपांग्रे साना सवारीसाधन र दुईपांग्रे सवारीसाधन उक्त स्थानमा राख्ने गरिएको छ । सुरुवाती समयमा निःशुल्क पार्किङको व्यवस्था गरिए पनि केही दिनबाट थप व्यवस्थापनसहित शुल्क लिएर पार्किङको व्यवस्थापन मिलाइने बताइएको छ । प्रमुख काफ्लेका अनुसार चार सयवटा साना सवारीसाधन र एक हजारवटा मोटरसाइकल अट्ने पार्किङ गत २२ वैशाखदेखि नै सञ्चालनमा आएको हो । टावर निर्माणको साउन ०७२ बाट बसपार्कलाई खुलामञ्चमा स्थानान्तरण गरिएको थियो ।
