कतारमा सञ्चालन भइरहेको विश्वकप २२औँ संस्करण हो । विश्वकपको तथ्यांकअनुसार २१ मध्ये नौ फाइनल युरोपियन राष्ट्रबीच मात्र भए । संयोग कस्तो छ भने इटालीले चारैपटक विवश्वकप उपाधि जित्दा युरोपकै प्रतिद्वन्द्वीलाई फाइनलमा हराएको थियो । विश्वकपमा दुई संस्करण मात्र दक्षिण अमेरिकीबीच भएको थियो । अहिलेसम्म विश्वकपको इतिहासमा दक्षिण अमेरिका र युरोपियन राष्ट्रबीच मात्र उपाधि भिडन्त भएको छ ।
इटाली २–१ चेकोस्लोभाकिया
सन् १९३४ (अतिरिक्त समय)
विश्वकपको दोस्रो संस्करणमै दुई युरोपियन राष्ट्रबीच उपाधि भिडन्त भएको थियो । उपाधिको छिनोफनो अतिरिक्त समयबाट भयो । खेलको ७१औँ मिनेटमा पुकले चेकोस्लोभाकियालाई १–० को अग्रता दिलाए । खेलको ८१औँ मिनेटमा इटालीले १–१ को बराबरी गोल फर्कायो । अतिरिक्त समयको पाँचौँ मिनेटमा स्चिआभिनोले गोल गर्दै इटालीलाई २–१ को जित दिलाए । स्चिआभिनोको गोलमै इटाली पहिलोपटक विजेता बन्यो ।
इटाली ४–२ हंगेरी
सन् १९३४
विश्वकप इतिहासमा इटाली ब्याक टु ब्याक उपाधि जित्ने पहिलो राष्ट्र हो । फ्रान्समा भएको तेस्रो संस्करणमा इटालीले उपाधि रक्षा गर्ने क्रममा हंगेरीलाई फाइनलमा ४–२ ले हरायो । इटालीले खेलको छैटौँ मिनेटमा कोलाउसीले १–० का लागि गोल गरे । खेलको आठौँ मिनेटमा टिकोसले हंगेरीलाई १–१ का लागि गोल गरे । खेलमा पिओलाले १६औँ र २२औँ मिनेटमा गोल गर्दै इटालीलाई उपाधि दिलाए ।
पश्चिम जर्मनी ३–२ हंगेरी
सन् १९५४
विश्वकपको पाँचौँ संस्करणमा युरोपियन राष्ट्रबीच नै फाइनल भयो । स्विट्जरल्यान्डमा भएको विश्वकपको फाइनलमा पश्चिम जर्मनीले हंगेरीलाई ३–२ ले पाखा लगाउँदै उपाधि उचाल्यो । उपाधि भिडन्तको पहिलो १० मिनेट नाटकीय भयो । यस अवधिमा तीन गोल भएको थियो । पुस्काले खेलको छैटौँ र जिबोरले आठौँ मिनेटमा गोल गर्दै हंगेरीलाई २–० को अग्रता दिलाए । खेलको १०औँ मिनेटमा मोर्लोकले २–१ को अन्तरमा झारे । खेलको १८औँ मिनेटमा राहनले पश्चिम जर्मनीलाई २–२ को बराबरी गरे । खेलको ८४औँ मिनेटमा राहनले पश्चिम जर्मनीलाई विश्वकप उपाधि दिलाउने गोल गरे ।
इंग्ल्यान्ड ४–२ पश्चिम जर्मनी
सन् १९६६ (अतिरिक्त समय)
इंग्ल्यान्डले पहिलोपटक आयोजना गरेको विश्वकपको फाइनलमा पश्चिम जर्मनी परेको थियो । इंग्ल्यान्डले पश्चिम जर्मनीलाई अतिरिक्त समयमा ४–२ ले हराउँदै पहिलोपटक विश्वकप उपाधि उचाल्यो । खेलको १२औँ मिनेटमा हालेरले पश्चिम जर्मनीलाई १–० को अग्रता दिलाए । खेलको १८औँ मिनेटमा इंग्ल्यान्डलाई १–१ को बराबरी गराए । खेलको ७८औँ मिनेटमा पेटर्सले इंग्ल्यान्डलाई २–१ को स्थितिमा राखे । खेलको वेवरले पश्चिम जर्मनीलाई २–२ को स्थितिमा ल्याए । हट्र्सले अतिरिक्त समयमा दुई गोल गर्दा इंग्ल्यान्डले बाजी मार्यो ।
पश्चिम जर्मनी २–१ नेदरल्यान्ड्स
सन् १९७४
विश्वकपको दशौँ संस्करणमा युरोपियन राष्ट्रबीच नै उपाधि भिडन्त भएको थियो । यसपटक पश्चिम जर्मनी र नेदरल्यान्ड्सबीच फाइनल भयो । प्रतिस्पर्धामा पश्चिम जर्मनीले नेदरल्यान्ड्सलाई ३–१ ले हराउँदै दोस्रोपटक उपाधि उचाल्यो । खेलको दोस्रो मिनेटमा नेदरल्यान्ड्सले पेनाल्टी गोल गर्दै १–० को अग्रता लियो । खेलको २५औँ मिनेटमा व्रेटनर र खेलको ४३औँ मिनेटमा मुलरले गोल गर्दै पश्चिम जर्मनीलाई उपाधि दिलाए ।
इटाली ३–१ पश्चिम जर्मनी
सन् १९८२
स्पेनले आयोजना गरेको विश्वकप इटालीले हात पार्यो । इटालीले फाइनलमा युरोपियन राष्ट्र पश्चिम जर्मनीलाई ३–१ को फराकिलो अन्तरले पाखा लगायो । फाइनलका चारै गोल मध्यान्तरपछि भएको थियो । खेलको ५७औँ मिनेटमा रोसीले इटालीलाई १–० को अग्रता दिलाए । खेलको ६९औँ मिनेटमा टेडेली र खेलको ८१औँ मिनेटमा अल्टोवेलीले गोल गर्दा इटाली ३–० ले अगाडि रह्यो । खेलको ८३औँ मिनेटमा पश्चिम जर्मनीले एक गोल फर्काएको थियो ।
इटाली १–१ फ्रान्स
सन् २००६ (५–३ पेनाल्टी सुटआउट )
इटालीले चौथोपटक विश्वकप उपाधि उचाल्न २४ वर्ष प्रतीक्षा गर्यो । सन् २००६ मा जर्मनीमा भएको विश्वकपमा इटालीले फाइनलमा युरोपकै राष्ट्र फ्रान्सलाई पेनाल्टी सुटआउटमा स्तब्ध पार्दै चौथोपटक ट्रफी हात पार्यो । निर्धारित समयमा दुवै पक्षबाट १–१ को बराबरी भएको थियो । निर्धारित समयमा जिनेदिन जिदानले सातौँ मिनेटमा पेनाल्टी गोल गर्दै फ्रान्सलाई १–० को अग्रता दिलाए । खेलको १९औँ मिनेटमा मेटेराजीले इटालीलाई १–१ को बराबरीमा ल्याए । अतिरिक्त समयमा जिदानले रातो कार्ड पाएका थिए ।
स्पेन १–० नेदरल्यान्ड्स
सन् २०१० (अतिरिक्त समय)
दक्षिण अफ्रिकामा पहिलोपटक आयोजना भएको विश्वकपमा नयाँ विजेता स्पेन बन्यो । स्पेनले विश्वकपभरि नै बल पोसेसन पकड जमाउँदै विश्व च्याम्पियन उपाधि जित्यो । निर्धारित समयमा गोलरहित बराबरी भएको थियो । स्पेनले अतिरिक्त समयमा गोल गर्दा नेदरल्यान्ड्सको उपाधि जित्ने सपना पूरा भएन । स्पेनका लागि विश्व च्याम्पियनसिप गोल एन्ड्रेस इनिस्टाले गरेका थिए ।
फ्रान्स ४–२ क्रोएसिया
सन् २०१८
२१औँ विश्वकपको फाइनल दुई युरोपियन राष्ट्रबीच भयो । फ्रान्स दोस्रोपटक फाइनलमा पुग्दा क्रोएसिया पहिलोपटक पुग्यो । फ्रान्सले क्रोएसियालाई ४–२ ले हराउँदै दोस्रोपटक विश्वकप ट्रफी उचाल्यो । फ्रान्सका लागि ग्रिजम्यान, पोग्वा र एम्बाप्पेले गोल गरेका थिए । क्रोएसियाका लागि पेरिसिक र मान्डुजिकीले गोल गरे । मान्डुजिकीले खेलको १८औँ मिनेटमा आत्मघाती गोल गरेका थिए ।
