३–१ ले पछि परेको स्थितिमा खेल फर्काउँदै स्पेनिस क्लब रियल म्याड्रिडले युरोपियन च्याम्पियन्स लिगमा सनसनीपूर्ण कमब्याक गरेको छ । इटालियन क्लब रोमाविरुद्ध रियाल ४–३ को रोमाञ्चक जित निकाल्न सफल भयो ।
रोमको ओलिम्पिको रंगशालामा रियलका लागि केलियन एमबाप्पे, कार्लोस एस्पी, एन्ड्रिक र एन्टोनियो रुडिगरले गोल गरेका थिए । यता, रोमाका लागि डोन्येल मालेनले दुई तथा मार्टेन डे रुनले एक गोल गरे । योसँगै फ्रान्सका कप्तान एमबाप्पेले सयौँ च्याम्पियन्स लिग खेल खेलेका छन् । २७ वर्षीय एमबाप्पे च्याम्पियन्स लिगमा सय खेल खेल्ने सबैभन्दा कान्छा खेलाडी बने ।
यसअघि अर्जेन्टिनाका लियोनल मेसीले यो कीर्तिमान बनाएका थिए । सन् २०१५ मा २८ वर्षको उमेरमा मेसीले सय च्याम्पियन्स लिग खेल खेल्ने कीर्तिमान बनाएका थिए । यता, लगातार दोस्रो जितसँगै दुई खेलबाट ६ अंक जोडेको रियल आठौँ स्थानमा छ । पराजित रोमा १ अंकका साथ २५औँ स्थानमा रह्यो ।
अग्रता रियलकै
दोस्रो हाफमा रियल ३–१ ले पछि परेको थियो । अन्तिम आठ मिनेटमा तीन गोल फर्काउँदै रोमाञ्जक जित निकाल्यो । खेलको २०औँ मिनेटमा रुनको गोलमार्फत रोमाले अग्रता लिएको थियो । तर, टोलीले त्यसलाई लामो समयसम्म टिकाउन सकेन । पाँच मिनेटपछि नै एमबाप्पेले रियललाई बराबरीमा ल्याए । पहिलो हाफ १–१ को बराबरीमा टुंगियो ।
त्यसपछि मालेनले ५१ र ५८औँ मिनेटमा गोल गर्दा रोमा ८१औँ मिनेटसम्म ३–१ को अग्रता लिएको थियो । तर, एस्पीले ८२ र एन्ड्रिकले ८५औँ मिनेटमा गोल गर्दै रियललाई ३–३ को बराबरीमा ल्याए । निर्धारित समयको अन्तिम मिनेटमा रुडिगरले विजयी गोल गरेका थिए ।
सिटीको घरमा पिएसजीको दबदबा
साबिक विजेता पेरिस सेन्ट जर्मेन (पिएसजी)ले अर्काे उपाधि दाबेदार इंग्लिस क्लब म्यानचेस्टर सिटीविरुद्ध ४–२ को जित निकाल्यो । सिटीको घरेलु मैदान इत्तिहाद रंगशालामा पिएसजीलाई जित दिलाउन डेसिरे डुए, ओस्माने डेम्बेले, भिटिन्हा र माग्नेस अक्लियुसले गोल गरेका थिए ।
सिटीका लागि दुवै गोल एर्लिङ हालान्डले गरेका हुन् । तर, उनले टिमलाई हारबाट जोगाउन सकेनन् । योसँगै एन्जो मारेस्काको सिटीले सिजनमा पहिलो हार व्यहोरेको छ । खेलको १५ मिनेटमा दुई गोल व्यहोरेपछि सिटी दबाबमा आएको थियो । टोली पहिलो हाफमा ३–० ले पछि पर्यो । पहिलो हाफमा बिर्सनलायक प्रदर्शन गरेको सिटी दोस्रो हाफमा भने सम्हालिएको थियो । ‘पहिलो हाफमा बिर्सनलायक प्रदर्शन गर्यौँ । त्यसका लागि समर्थकसँग माफी माग्छु । दोस्रो हाफ भने सोचेजस्तो भयो । तर, नतिजा आएन,’ प्रशिक्षक एन्जोले भने ।
भिनिसियसलाई चार खेलमा प्रतिबन्ध
स्पेनिस फुटबल महासंघको अनुशासन समितिले रियल म्याड्रिडका फरवार्ड भिनिसियस जुनियरलाई स्पेनिस ला लिगाका चार खेलमा प्रतिबन्ध लगाएको छ । ला लिगाअन्तर्गत भिल्लारियलविरुद्धको खेलमा विपक्षी खेलाडीको दुव्र्यवहार गरेपछि ब्राजिलियन स्टारले सिधै रातो कार्ड पाएका थिए ।
उनले मैदानमा गरेको व्यवहार र रेफ्रीमाथि विरोध जनाएका कारण प्रतिबन्ध लगाइएको महासंघले जनाएको छ । अब भिनिसियसले बार्सिलोनाविरुद्धको एल क्लासिकोसहित सेभिया, रियल रेसिङ र भ्यालेन्सियाविरुद्धको खेल गुमाउनेछन् । रियलले भने प्रतिबन्धविरुद्ध अपिल गर्ने जनाएको छ । भिल्लारियलविरुद्धकै खेलमा फ्रेन्च डिफेन्डर कोनाटेलाई दिइएको पहेँलो कार्डविरुद्ध रियलको अपिल भने सफल भएको थियो ।
