- वि.सं २o७९ कार्तिक १८ शुक्रबार
नेपाल अन्तर्राष्ट्रिय नाट्य महोत्सव २०७९ का लागि विश्वभरबाट छनोट भएका नाटकहरूको सूची र मञ्चन तालिका सार्वजनिक भएको छ । मण्डला थिएटरको आयोजनामा ९ मंसिरबाट सुरु हुने महोत्सवमा छनोट भएका २२ नाटकको सूची तथा नाटकहरू मञ्चन हुने समय महोत्सवको आधिकारिक वेबसाइट (नेटफेस्ट)मार्फत सार्वजनिक गरिएको हो ।
महोत्सवमा नेपालसहित भारत, भुटान, श्रीलंका, रुस, इटाली, स्पेन, बेलायत, बेलारुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटक समावेश छन् ।
तालिकाअनुसार मण्डला थिएटरको थापागाउँ, काठमाडौंस्थित मुख्य नाटकघर, स्टुडियो र खुला परिसर गरी तीन स्थानमा हरेक दिन फरक–फरक नाटक मञ्चन हुनेछन् ।
नौ दिनसम्म सञ्चालन हुने महोत्सवको उद्घाटनको दिन दुई र समापनको दिन एक नेपाली नाटक मञ्चन हुनेछन् । महोत्सव निर्देशक तथा मण्डला थिएटरका अध्यक्ष सिर्जना सुब्बाले यस महोत्सवलाई नाटकप्रेमीहरूले निकै उत्साहका साथ नियालिरहेको बताइन् ।
