काठमाडौं- ५ को विकास प्रदीपको टिमले मात्र गर्न सक्छ : नरहरि आचार्य 

कांग्रेसका बाैद्धिक नेता नरहरि आचार्यले काठमाडौं- ५ को विकास प्रदीप पौडेलको टिमले मात्र गर्न सक्ने बताएका छन्।

आइतबार नेपाल लोकतान्त्रिक खेलकुद संघले आयोजना गरेको खेलाडी सम्मान तथा शुभकामना आदानप्रदान कार्यक्रमलाई सम्बोधन गर्दै आचार्यले युवाहरूको टिमले मात्र विकासको ढोका खुलाउन सक्ने बताएका हुन्। 

‘काठमाडौं- ५ मा युवाहरूको बलियो टिम छ,’ कार्यक्रममा बोल्दै उनले भने, ‘यो टिमले जिते मात्र काठमाडौं- ५ मा विकासका ढोका खुल्न थाल्छन्।’ 

साथै, कांग्रेसले सार्वजनिक गरेको घोषणापत्रलाई हुबहु कार्यान्वयन गराउनका लागि पनि प्रदीपले जित्नैपर्ने उनले बताए। ‘कांग्रेसले सार्वजनिक गरेका प्रतिबद्धतालाई पूरा गर्न अब ५ वर्ष प्रदीपजीले घच्घच्याउनुहुनेछ,’ आचार्यले भने। 

अहिले भएको चुनावी गठबन्धन देशलाई संकटबाट बचाउनका लागि भएको उनले प्रस्ट पारे। त्यसैले, गठबन्धनप्रति जिम्मेवार रहन कार्यकर्तालाई आग्रहसमेत गरे। 

‘जब-जब देशलाई संकट पर्छ त्यतिवेला कांग्रेसले नै नेतृत्व गर्दै आएको छ,’ आचार्यले भने, ‘अहिलेको गठबन्धन पनि कांग्रेसले खोजेर भएको होइन त्यस्तै परिस्थितिले उब्जाएको हो। त्यसैले गठबन्धनप्रति सबैजना जिम्मेवार बनौँ।’ 

साथै, अहिलेसम्म भएका निर्वाचन कांग्रेसकै नेतृत्वले गर्दै आएको पनि उनले स्मरण गरे। ‘नेपालमा कांग्रेसबाहेक अन्य पार्टीले निर्वाचन गराउन सकेका छैनन्,’ उनले भने, ‘लोकतन्त्रको रक्षा र निर्वाचन गर्नका लागि कांग्रेसकै नेतृत्व चाहिने रहेछ भन्ने प्रमाणित भएको छ।’ 

त्यसैले मंसिर ४ गतेको निर्वाचनमा कांग्रेसलाई सम्झिएर मतदान गर्न काठमाडौं- ५ का मतदातालाई आचार्यले आह्वानसमेत गरे। झन्डै ५ वर्षयता स्वास्थ्यलाभ गरिरहेका आचार्य लामो समयपछि जनतामाझ साक्षात्कारका लागि उपस्थित भएका हुन्। कार्यक्रममा खेलाडीहरूलाई सम्मान गर्दै खेलाडीको मिहिनेतले देशकै गरिमा बढाउने बताए। 

‘राष्ट्रको पहिचान गराउने एउटा सशक्त माध्यम खेल नै हो,’ उनले भने, ‘खेलाडीले नै देशको गरिमा बढाउने हुन्।’ कार्यक्रममा विशेष अतिथिका रूपमा युवा नेता तथा काठमाडौं प्रतिनिधिसभा- ५ का उम्मेदवार प्रदीप पौडेल उपस्थित थिए। 

कार्यक्रममा बोल्दै पौडेलले  खेलकुदमा लगानी बढाएर सबै युवाको खेलकुदमा पहुँच हुने अवस्था सिर्जना गर्ने प्रतिबद्धता व्यक्त गरे। ‘हरेक युवालाई खेलकुदसँग जोड्न चाहन्छौँ,’ उनले भने, ‘समाजमा बाहुबली नेतृत्व ल्याउने होइन विधिवत् प्रतिस्पर्धाले नेतृत्व ल्याउने हो भन्ने मान्यता समाजमा स्थापित गर्नुपर्नेछ। त्यो खेलकुदको माध्यमबाट सम्भव छ।’  

त्यसैले, खेलकुदको विकासदेखि समग्र काठमाडौं- ५ को विकासका निम्ति वाम-लोकतान्त्रिका उम्मेदवार विजयी हुनुपर्ने प्रदीपको जोड छ। ‘विगतलाई हेरेर अब मतदाताले मूल्यांकन गर्न सक्नुपर्छ,’ प्रदीपले उद्घोष गरे, ‘जसले आफूमाथि बेइमानी गर्दैन भन्ने लाग्छ, उसैलाई मत दिनुस् अब क्रान्तिबाट परिवर्तन आउँदैन परिवर्तन ल्याउने भनेको आवधिक निर्वाचनले नै हो।’ 

टोखामा आयोजित उक्त कार्यक्रममा बोल्दै प्रदीपले टोखामा उत्पादन हुने चाकुलाई अन्तर्राष्ट्रिय बजारमा पुर्याउने प्रतिबद्धता व्यक्त गरे। ‘टोखाको चाकु स्वदेशी बजारमा मात्र नभएर अन्तर्राष्ट्रिय बजारमा पुर्याउनेछौँ,’ उनले भने, ‘टोखा पुरानो नेवारी बस्ती पनि हो, यहाँको सभ्यता र संस्कृतिको विकासका लागि अध्ययन गर्नेछौँ।’ 

त्यस्तै, काठमाडौं- ५ लाई सांस्कृतिक सहर निर्माण गर्न सूक्ष्म अध्ययन गरिने उनले बताए। ‘हामी काठमाडौं-५ लाई कसरी सांस्कृतिक सहर बनाउन सकिन्छ । त्यसबारेमा सूक्ष्म अध्ययन गर्नेछौँ,’ प्रदीपले आफ्ना योजना सुनाए, ‘यहाँका विकासका सम्भावनाको खोजी र अध्ययन गर्नेछौँ, संसद् विकास कोषको पैसा वार्षिक सार्वजनिक अडिट गर्ने व्यवस्था मिलाउनेछौँ,  हाम्रा कामको मूल्यांकन गर्न टोलटोलमा समिति बनाउनेछौँ।’

लोकतान्त्रिक खेलकुद संघका केन्द्रीय सचिव मनीष जोशीको सभापतित्वमा सम्पन्न कार्यक्रममा क्रिकेटर पारस खड्का, फुटबलर रामचन्द्र श्रेष्ठ, मनीन्द्रराज जोशी बक्सिङका अर्जुनबहादुर केसी, पुष्पराज जोशी, पर्वतारोही पूर्णिमा श्रेष्ठ र नवौँ राष्ट्रिय खेलकुदको विभिन्न विधामा पदक विजेतासहित ४० जना खेलाडीलाई सम्मान गरिएको थियो।