निर्माणाधीन विमानस्थलमा दुर्घटना, दुईजनाको मृत्यु, दुई घाइते

सन्धिखर्कस्थित निर्माणाधीन विमानस्थलमा मोटरसाइकल दुर्घटना हुँदा दुईजनाको मृत्यु भएको छ । दुर्घटनामा दुईजना घाइते भएका छन् । 

दुर्घटनामा सन्धिखर्क नगरपालिका– १ मिडियाचोकका २६ वर्षीय रोशन सुनाम र हललाइनका २२ वर्षीय कृतिम रायमाझीको घटनास्थलमै मृत्यु भएको जिल्ला प्रहरी कार्यालयका प्रमुख प्रहरी नायब उपरीक्षक मुकुन्द रिजालले जानकारी दिए । उनीहरू प्रदेश २–०३८प५०३२ नम्बरको मोटरसाइकलमा सवार थिए ।

सन्धिखर्क– १० शिखरबार्नीमा निर्माणाधीन हवाईमैदानको रनवेमा मोटरसाइकल चलाउने क्रममा दुर्घटना भएको डिएसपी रिजालले बताए । उनका अनुसार गएराति दुई मोटरसाइकल अनियन्त्रित भई दुर्घटना भएको हो । 

यस्तै, बा. २५प८८७६ नम्बरको मोटरसाइकलमा सवार सन्धिखर्क– २ आटिकापाटाका ५७ वर्षीय हेमराज भुसाल र २० वर्षीय विष्णु पराजुली घाइते भएका छन् । घाइते दुवैको बुटवलस्थित मर्सिटी अस्पतालमा उपचार भइरहेको छ । 

अत्यधिक गतिका कारण घटना भएको प्रहरीको प्रारम्भिक अनुसन्धानबाट खुलेको छ । घटनाबारे अनुसन्धान भइरहेको जिल्ला प्रहरी कार्यालयले जनाएको छ ।
रासस