- वि.सं २o७९ असोज २४ सोमबार
अविरल वर्षाले घर भत्किँदा सख्त घाइते भएका चंखेली गाउँपालिका– ६ मेल्छामका तीन घाइतेलाई नेपाली सेनाको हेलिकोप्टरबाट उद्धार गरिने भएको छ।
नेपाली सेनाको हेलिकोप्टर उद्धारका लागि कालिकोटमा अवतरण गरेको छ। मेल्छामबाट तीन घाइते र सर्केगाड गाउँपालिका– ७ की सुत्केरी महिलाको हेलिकोप्टरबाट उद्धार गर्न लागेको जिल्ला प्रहरी कार्यालयका डिएसपी कृष्णराज ओझाले जानकारी दिए।
‘पहिलो फ्लाइटमा मेल्छाम र रोडिकोटबाट बिरामीको उद्धार गर्छ। त्यसपछि चंखेलीको दार्माबाट बिरामी लिएर ताजाँकोट गाउँपालिका– ५ को घाइते बालकको उद्धार गर्छौँ,’ डिएसपी ओझाले नयाँ पत्रिकासँग भने। सर्केगाड गाउँपालिका– ७ की २५ वर्षीया पवित्रा छन्त्याल चार दिनदेखि सुत्केरी व्यथाले छटपटाएकी छिन्।
अविरल वर्षाका कारण चंखेलीको मेल्छाममा एकै घरका चार र ताजाँकोट गाउँपालिका– ४ मा एकजना गरी पाँचजनाको मृत्यु भएको छ।
