- वि.सं २o७९ भदौ ३० बिहीबार
निलम्बित प्रधानन्यायाधीश चोलेन्द्रशमशेर जबराले महाभियोग समितिसँगको बयानमा विभिन्न कानुन व्यवसायीहरूलाई मुछेपछि बिहीबार समितिले केहीलाई बयानका लागि बोलाएको थियो । तीमध्ये एक थिए, नेपाल बार एसाेसिएसनका पूर्वमहासचिव लीलामणि पौडेल ।
केही दिनअघि समितिलाई बयान दिने क्रममा जबराले नेपाल बारका तत्कालीन महासचिव पौडेलले आफूलाई न्यायाधीश बनाउन दबाब दिएको आरोप लगाएका थिए । त्यसबारे समितिले बिहीबार पौडेललाई बयानका लागि बोलाएको थियो ।
त्यहाँ सांसदहरूले पौडेललाई जबराको आरोपबारे सोधे । जवाफमा पौडेलले भने जबरा प्रमुख दलका शीर्ष नेतालाई प्रभावमा पारेर कार्यपालिकाकै नेतृत्वमा पुग्ने योजनामा रहेको बताए ।
जबराले एकै समय केपी शर्मा ओली, शेरबहादुर देउवा र प्रचण्डलाई खल्तीमा राख्न सक्ने भन्दै उनले भने, ‘उहाँले त्यसबखत भनेको सबै सार्वजनिक गर्दिनँ तर यो मुलुकको सारा बागडोर म हाँक्छु भन्ने तयारीमा हुनुहुन्थ्यो । खिलराज रेग्मी बन्ने तयारीमा हुनुहुन्थ्यो ।’
उनले आफूले जबरालाई एकल रूपमा भने कहिल्यै नभेटेको दाबी गरे । भेटेको प्रमाणित गरे कानुन व्यवसायीको इजाजतपत्र च्यातेर हिँड्ने र कहिल्यै वकालत नगर्ने उनको जिकिर थियो ।
