घरमै यसरी बनाउन सकिन्छ मार्गेरिटा पिज्जा

पिज्जा घरमै पनि सजिलै बनाउन सकिन्छ । गहुँको पिठो, टमाटरको सस, पनिर, मसाला र अन्य सागसब्जी मिसाएर यो तयार हुन्छ । पिज्जालाई फरक–फरक किसिमले बनाउन सकिन्छ । यहाँ हामीले प्रचलितमध्येको एक मार्गेरिटा पिज्जा बनाउने तरिका प्रस्तुत गरेका छौँ :

- पिज्जाका लागि सबैभन्दा पहिले डो बनाउनुपर्छ । यसका लागि गहुँको पिठो, पानी, चिनी र ओलिभ तेलको मात्रा मिलाउनुपर्छ । 

- यी सबै समावेश गरेर राम्ररी मुछ्नुपर्छ । सजिलोका लागि स–साना डल्ला पारेर मुछ्न सकिन्छ । मुछेर एकदेखि डेढ घन्टासम्म हावा नछिर्ने ठाउँमा राखेपछि डो तयार हुन्छ । 

सस

- गोलभेँडाको सस बन्छ । त्यसैले सबैभन्दा पहिला गोलभेँडालाई उसिनेर बाहिरको बोक्रा र बिउ निकाल्नुपर्छ । अनि काटेर लेदो पार्नुपर्छ । 

- तातेको तेलमा अदुवा, प्याज, तेजपत्ता र सेलरी नामक हर्ब राखेर एकछिन चलाउनुपर्छ । यसमा मसिनो गरी काटेको गाँजर पनि राख्न सकिन्छ । अन्तिममा अघि उसिनेर काटेको गोलभेँडा राख्नुपर्छ । यसमा नुन र मरिच राखेर पकाउनुपर्छ । 

- चाखेर हेर्दा धेरै अमिलो लागेमा अलिकति चिनी र धेरै गुलियो भएमा भिनेगर राख्न सकिन्छ । यसमाथि ओरिगानोका पात राखेर चलाउँदा छुट्टै खालको स्वाद आउँछ । 

- डोलाई बेलेर रोटी बनाउने र त्यसमाथि सस राख्नुपर्छ । ठीक मात्रा मिलाएर त्यसमाथि मोजरेला चिज राख्नुपर्छ । यसरी मार्गेरिटा पिज्जा बन्छ । यसमा मन पर्ने खानेकुरा राखिन्छ अनि ओभनमा राखेर पकाइन्छ ।

- आफ्नो इच्छाअनुसार चिकेन, च्याउ वा सागसब्जी राखेर पिज्जा बनाउन सकिन्छ । यसका लागि पहिले चिज राखेर मार्गेरिटा पिज्जा तयार गर्नुपर्ने हुन्छ ।