- वि.सं २o७९ भदौ ८ बुधबार
साउदी अरेबियाले ग्लोबल एआई (आर्टिफिसियल इन्टेलिजेन्स) सम्मेलन गर्ने भएको छ। साउदी अरेबियाको समाचार समिति साउदी प्रेस एजेन्सीले दिएको जानकारीअनुसार साउदी अरेबियाले आगामी सेप्टेम्बर महिनामा दोस्रो विश्व एआई सम्मेलन गर्न लागेको हो।
‘राम्रो मानवीयताका लागि आर्टिफिसियल इन्टेलिजेन्स’ भन्ने विषयमा केन्द्रित रहेर सो सम्मेलन गर्न लागिएको समाचारमा जनाइएको छ। सम्मेलनमा आर्टिफिसियल इन्टेलिजेन्समा काम गरिरहेका विश्वका एक सय विज्ञ सहभागी हुने र आफ्नो विशेषज्ञताका विषयमा कार्यपत्र प्रस्तुत गर्ने बताइएको छ।
सो सम्मेलनमा स्मार्ट सिटी, मानवीय क्षमताको विकास, स्वास्थ्य क्षेत्र, यातायात, संस्कृति तथा सम्पदा, ऊर्जा आदिका क्षेत्रमा आर्टिफिसियल इन्टेलिजेन्सले गर्न सक्ने कामहरूका बारेमा पनि छलफल गरिनेछ।
मानिसको सहयोगी एवं मानवीय सेवा र जनशक्तिको पूर्तिका क्षेत्रमा आर्टिफिसियल इन्टेलिजेन्सले गर्न सक्ने कामबारे सम्मेलनमा छलफल हुनेछ। हाल विश्वमा प्रयोगमा आइरहेको आर्टिफिसियल इन्टेलिजेन्स विषयमा आवश्यक मात्रामा परामर्श र छलफल गरी यसको प्रयोगमा देखा परिरहेका चुनौती र त्यसको समाधानका उपायहरूका बारेमा पनि सम्मेलनमा छलफल हुने बताइएको छ।
मानवीय सेवाका क्षेत्रमा बढीभन्दा बढी आर्टिफिसियल इन्टेलिजेन्सलाई के–कसरी प्रयोग गर्न सकिन्छ भन्ने विषयमा सम्मेलनमा विज्ञहरूबीच छलफल हुने समाचारमा जनाइएको छ। सिन्ह्वा
