- वि.सं २o८१ बैशाख २३ आइतबार
एमालेका सांसद प्रदीप ज्ञवालीले नागरिकता विधेयकजस्तो संवेदनशील विषयमा जनमत विभाजित नगर्न सत्तापक्षलाई चेतावनी दिएका छन्। बिहीबार प्रतिनिधिसभा बैठकमा राष्ट्रपतिबाट फिर्ता पठाइएको नागरिकता विधेयकमाथिको छलफलमा भाग लिँदै उनले यस्तो चेतावनी दिएका हुन्।
नागरिकताजस्तो संवेदनशील विषयलाई ‘हेड काउन्ट’को रूपमा नलिई यसमा विवेक पुर्याएर आवश्यक निर्णय लिनुपर्नेमा उनको जोड छ। ‘टाउकोको गणनाको आधारमा त ०३७ सालमा राजा वीरेन्द्रले पञ्चायतलाई जिताएको पनि घोषणा गरेका थिए। टिक्यो त्यो ? टिकेन। त्यसो भएर टाउकाको गणना ठूलो कुरा होइन । विवेकको गणनाचाहिँ सबभन्दा ठूलो कुरा हो,’ उनले भने।
राष्ट्रपतिबाट फिर्ता भएको विधेयकलाई सर्वस्वीकार्य बनाउने अवसरको रूपमा लिन सांसद ज्ञवालीले आग्रह गरेका छन्। उनले सो विधेयकमा संसदीय नियमावलीअनुसार संशोधन प्रस्ताव राख्न पाउने अधिकार सुनिश्चित गर्नसमेत सभामुख अग्निप्रसाद सापकोटाको ध्यानाकर्षण गराएका छन्। बहुमतको आधारमा सो विधेयक जबर्जस्ती पारित गरेर पठाउने प्रयास गरिए त्यसको परिणाम राम्रो नहुने उनको चेतावनी छ।
