- वि.सं २o८१ बैशाख २५ मंगलबार
म्याग्दीको मालिका गाउँपालिका– २ रुम तामेङमा मंगलबार बिहान करिब ४ बजे गाउँमाथिको भिरबाट खसेको पहिरोमा परी एकै परिवारका पाँचजनाको ज्यान गएको छ ।
स्थानीय घामबहादुर विक, उनकी ३४ वर्षीया पत्नी राममाया, छोराहरू १८ वर्षीय नवीन, १५ वर्षीय राजन र सात वर्षीया छोरी अस्मी पहिरोमा पुरिएका हुन् । जिल्ला प्रहरी कार्यालय म्याग्दीका डिएसपी तिलक भारतीका अनुसार पाँचैजनाको शव फेला परेको छ ।
नवीन र राजन स्थानीय राष्ट्रिय माविमा क्रमशः कक्षा १० र आठमा तथा अस्मी नमुना बोर्डिङ स्कुलमा पढ्दै थिइन् । परिवारका चार दाजुभाइमध्ये माइला घामबहादुरको ढुंगाले छाएको र पाली हालेको एकतले घर थियो । वृद्ध आमा र अन्य दाजुभाइको परिवार केही पर अर्को घरमा बस्दै आएकाले जोगिए ।
‘घामबहादुर परिवारसँग बसेर स्वदेशमै स्वरोजगार गरी आत्मनिर्भर बन्छु भनेर कतारबाट फर्किएका थिए, खच्चडबाट गाउँघरमा खाद्यान्न ढुवानी गरी घरपरिवार पाल्न थालेका थिए । पहिरोले उनीसहित सिंगो परिवार र सबै सपना बगाइदियो,’ वडासदस्य भक्तिबहादुर घर्तीमगरले भने, ‘गाउँ नै शोकमा छ ।’ पहिरोले स्थानीय गोठे विकको घरसमेत बगाएको छ । गोठे र उनकी श्रीमती गोरी घाइते भएका छन् ।
