विभिन्न विधामा गिनिज बुक अफ वल्र्ड रेकर्डमा नाम सूचीकृत गर्न सफल नेपाली युवाहरूलाई उपराष्ट्रपति नन्दबहादुर पुनको उपस्थितिमा प्रमाणपत्र हस्तान्तरण गरिएको छ ।उपराष्ट्रपति कार्यालयमा सोमबार आयोजित कार्यक्रममा विश्वकै अग्लो स्थान (५०२० मिटर उचाइ)मा भिडियो छायांकन गरेर विश्व कीर्तिमान राखेका युवाहरूलाई प्रमाणपत्र हस्तान्तरण गरिएको हो ।
भिडियो छायांकन टिममा सहभागी टेकबहादुर राई, माया गुरुङ, बुद्धिराज राई, सिर्जना किराँती र शिखरजंग श्रेष्ठलाई प्रमाणपत्र र धनकुमार राई, राजु कार्की, गंगाराम राई, शिवराज जोशी र डम्बर सिंह राईलाई सहभागिताको प्रमाणपत्र प्रदान गरिएको हो । गीतमा पूर्ण राईले गितार र टेकबहादुर राईले किबोर्डमा भूमिका निर्वाह गरेका छन् ।
सोलुखुम्बुको खारे(मेरापिक जाने बाटो)स्थित ५०२० मिटर उचाइमा ‘सुन्दर हिमाल...’बोलको गीतको छायांकन गरेर गिनिज बुकमा ‘द हाइएस्ट म्युजिक भिडियो अन ल्यान्ड’ विधामा रेकर्ड राखिएको हो । सोही स्थानमा गीतको रेकर्डिङसमेत गरिएको थियो । कार्यक्रममा उपराष्ट्रपति पुनले भने, ‘नेपालीले विश्व कीर्तिमानी राख्नु निकै खुसीको कुरा हो । आगामी दिनमा पनि यस्तै सफलता मिल्दै जाओस् ।’
विश्व कीर्तिमानी समाजको आयोजनामा भएको कार्यक्रममा समाजका अध्यक्ष सन्चबहादुर राई, किराँत कोयी÷कोयु राई सोदेलकिमका केन्द्रीय उपाध्यक्ष गीतादेवी राईलगायतको उपस्थिति थियो ।