- वि.सं २o७९ असार ५ आइतबार
नयाँ पत्रिकाकर्मी दिवाकर मैनाली चलचित्र पत्रकारिता पुरस्कार– ०७७ बाट पुरस्कृत भएका छन् । चलचित्र पत्रकार संघ नेपालको २३औँ वार्षिकोत्सवको अवसरमा सञ्चारमन्त्री ज्ञानेन्द्रबहादुर कार्कीले मैनालीलाई पुरस्कार प्रदान गरेका हुन् ।
चलचित्र पत्रकारिता सम्मान– ०७७ बाट पत्रकार शान्तिप्रिय र राजन घिमिरे सम्मानित भएका छन् । चलचित्र पत्रकारिता पुरस्कारबाट पत्रकार आरडी शृंखला पनि पुरस्कृत भए । संघले तीन वर्षको चलचित्र पत्रकारिता सम्मान तथा पुरस्कार प्रदान गरेको छ ।
सञ्चारमन्त्री कार्कीले विभिन्न पत्रकारलाई सम्मान तथा पुरस्कार प्रदान गरेका थिए । संघले कोरोना महामारीका कारण रोकिएको दुई वर्षको पुरस्कारसँगै तीनै वर्षको सम्मान तथा पुरस्कार वितरण गरेको हो ।
०७८ सालको चलचित्र पत्रकारिता सम्मानबाट पत्रकार सुव्रतराज आचार्य र सन्दीप सापकोटा सम्मनित भएका छन् । सोही वर्षको चलचित्र पत्रकारिता पुरस्कारबाट कुमार आचार्य र गीता अधिकारी पुरस्कृत भए ।
चलचित्र पत्रकारिता सम्मान– ०७९ बाट पत्रकार राजाराम फुँयाल र लक्ष्मण सुवेदी सम्मानित भएका छन् । यसै वर्षको चलचित्र पत्रकारिता पुरस्कारबाट नेमिष गौतम र विष्णुप्रसाद सुवेदी पुरस्कृत भएका छन् । चलचित्र पत्रकारिता प्रोत्साहन पुरस्कारबाट उद्धव रसाइली पुरस्कृत भए ।
