जिप दुर्घटनामा एकको मृत्यु, १६ घाइते

धादिङको नीलकण्ठ नगरपालिका- ३ स्थित इजारामा बोलेरो जिप दुर्घटना हुँदा एकजनाको मृत्यु भएको छ । नीलकण्ठ नगरपालिका- २ बस्ने करिब ३० वर्षीय प्रेमबहादुर गुरुङको मृत्यु भएको जिल्ला प्रहरी कार्यालय धादिङले जनाएको छ ।

प्रहरीका अनुसार मंगलबार धादिङबेँसीबाट जुरेथुतर्फ जाँदै गरेको बा १८ च २८२० नम्बरको बोलेरो जिप अनियन्त्रित भई दुर्घटना हो । दुर्घटनामा परी १६ जना घाइते भएका छन् ।

दुर्घटनामा परी घाइते हुनेहरूमा नीलकण्ठ नगरपालिका- २ का ५४ वर्षीय सोमनाथ नेपाल, नीलकण्ठ १ का ६१ वर्षीय जंगबहादुर गुरुङ, सोही ठाउँका १८ वर्षीय सुनील राना मगर, २ वर्षीय रिदम गुरुङ, २२ वर्षीया सीता गुरुङ, ५० वर्षीया परीमाया गुरुङ, १८ वर्षीया कल्पना गुरुङ, ३८ वर्षीय रोमन गुरुङ, नीलकण्ठ २ का ४० वर्षीय शंकर गुरुङ, सोही ठाउँका २ वर्षीय सन्तोष गुरुङ, १ वर्षीय सविन नेपाली, ५ वर्षीय राजेन्द्र नेपाली, ४० वर्षीया शर्मिला थापा, ५७ वर्षीया उजेली नेपाली, २९ वर्षीया राधिका नेपाली र गोर्खा ध्याल्चोकी २६ वर्षीया ज्योति गुरुङ रहेको प्रहरीले जनाएको छ ।

घाइते सबैको जिल्ला अस्पताल धादिङमा उपचार भइरहेको छ । सवारीचालकलाई प्रहरीले निन्त्रणमा लिएको प्रहरीले जनाएको छ ।