Skip This
वैदेशिक रोजगारीमा जाने कामदारका लागि आवश्यक सबै प्रक्रिया रुपन्देहीमा नै उपलब्ध गराइने भएको छ । एक महिनाभित्र भिसा, मेडिकललगायतका सबै सेवाहरू रुपन्देहीमा उपलब्ध गराएर कामदारले वैदेशिक रोजगारीका लागि काठमाडाैँ धाउनुपर्ने बाध्यताको अन्त्य गराइने श्रम, रोजगार तथा सामाजिक सुरक्षामन्त्री कृष्णकुमार श्रेष्ठले जानकारी दिए । असारदेखि कामदारले भैरहवा एयरपोर्टबाट सीधै वैदेशिक रोजगारीमा जान सक्नेछन् । उनका अनुसार मन्त्रालयले १ असारदेखि औपचारिक रूपमा नै यसको उद्घाटन गर्नेछ ।
अहिले वैदेशिक रोजगारीमा जाँदा कामदारले अपनाउनुपर्ने सबै प्रक्रिया काठमाडौंमा सीमित छ । म्यानपावर कार्यालयदेखि अन्तर्राष्ट्रिय विमानस्थलका सेवाहरू काठमाडौंमा नै केन्द्रित हुँदा कामदारले अन्तर्वाता दिनेदेखि गन्तव्य मुलुकसम्म पुग्न काठमाडौंमा नै धाउनुपर्ने बाध्यता छ । तर, गत सातादेखि भैरहवास्थित गौतम बुद्ध विमानस्थल सञ्चालनमा आएपछि बिदामा नेपालमा आएका कामदार पुनः सोही श्रममा फर्कनका लागि भने काठमाडाैँमा धाउनुपर्ने बाध्यताको अन्त्य भएको छ । तर, भिसा र मेडिकल परीक्षणको सेवा काठमाडौंमा नै सीमित हुँदा पहिलोपटक विदेश जाने कामदार भने काठमाडौंमा नै धाउनुपर्ने बाध्यता यथावत् छ ।
वैदेशिक रोजगारीमा जाने कामदारले यथास्थानमा नै बसेर अनलाइनमार्फत कुनै पनि समयमा श्रम स्वीकृति लिन सक्नेछन् । वैदेशिक रोजगार कार्यालय ताहाचलले प्रदान गर्ने सबै खालको श्रम स्वीकृतिको सेवा अनलाइनमार्फत नै लिन सकिने व्यवस्था गरिसकेको छ । अब नेपालको कुनै पनि कुनामा बसेर अनलाइनमार्फत श्रम स्वीकृति लिन सकिने श्रम कार्यालय ताहाचलका प्रमुख रमेश अर्यालले बताए । बिदामा नेपालमा आएका कामदारलाई पुनः श्रम स्वीकृति लिनका लागि काठमाडाैँ आउनुनपर्ने उनले स्पष्ट पारे । पुनः श्रम स्वीकृति पनि अनलाइनमार्फत नै लिन सकिने हुँदा कामदारले गौतम बुद्ध अन्तर्राष्ट्रिय विमानस्थल हुँदै फेरि गन्तव्य मुलुकमा फर्कन सक्ने उनले बताए ।
कार्यालयले गत २ माघ ०७८ देखि पुनः श्रम स्वीकृति, ०७९ वैशाख २ गतेदेखि संस्थागत श्रम स्वीकृति अनलाइनमार्फत लिन सकिने व्यवस्था गरेको हो । ६ जेठदेखि नयाँ श्रम स्वीकृति पनि अनलाइनमार्फत नै लिन सकिने व्यवस्था गरेको हो ।
रोजगारीमा जाँदा कामदारले अभिमुखीकरण तालिम पनि लिनुपर्नेछ । मन्त्रालयका अनुसार तालिम दिने संस्था भैरहवामा समेत उपलब्ध भएकाले तालिमका लागि मात्रै काठमाडाैँ पुग्नुनपर्ने बताएको छ ।
भिसा र मेडिकल काठमाडाैँमै
भैरहवास्थित गौतम बुद्ध अन्तर्राष्ट्रिय विमानस्थल हुँदै गन्तव्य मुलुकमा जान चाहने नेपाली कामदारले भिसा र मेडिकल परीक्षणका लागि काठमाडौं नै आउनुपर्ने बाध्यता रहेको वैदेशिक रोजगार व्यवसायी संघका संयोजक विमल ढकालले बताए । उनका अनुसार हालसम्म म्यानपावर कम्पनीले शाखा विस्तार गरेका छैनन् र मेडिकल परीक्षण पनि काठमाडौंमा केन्द्रित छ । त्यसैले पहिलोपटक वैदेशिक रोजगारीमा जाने कामदार काठमाडाैँमा पुग्नुपर्ने भएको हो । तर, श्रममन्त्री कृष्णकुमार श्रेष्ठले केही दिनमा नै शाखा कार्यालय विस्तार गर्ने तयारी गरेको समेत बताए ।
