- वि.सं २o७९ जेठ २ सोमबार
सर्लाहीको ब्रह्मपुरी गाउँपालिकामा नेपाली कांग्रेसको प्यानलै विजयी भएको छ । कांग्रेसका तर्फबाट गाउँपालिका अध्यक्षमा रामपदारथ साह तेलीले ४,६६८ मत प्राप्त गरी विजय हासिल गरे । गाउँपालिका उपाध्यक्षमा श्यामकला यादवले ४,६१० मत प्राप्त गरी जित निकाल्न सफल भइन् ।
गाउँपालिका अध्यक्षको निकटतम् प्रतिस्पर्धामा रहेका लोकतान्त्रिक समाजवादी पार्टीका उम्मेदवार एवं निवर्तमान अध्यक्ष विनोदकुमार साहले ३,२७१ मत मात्र प्राप्त गरे । यस्तै, उपाध्यक्षको निकटतम् प्रतिस्पर्धी लोसपाकी गीतादेवी रायले ३,३११ मत प्राप्त गरिन् ।
यस्तै, यस गाउँपालिकाको वडाध्यक्षमा १ नम्बरमा कांग्रेसका निरञ्जनप्रसाद कल्वार, २ नम्बरमा शंकर साह तेली, ३ नम्बरमा गौतमकुमार यादव, ४ नम्बरमा श्यामबाबु साह, ५ नम्बरमा नवीनकुमार यादव र ६ नम्बरमा हरेन्द्रकुमार यादव विजयी भएका छन् ।
योसहित नेपाली कांग्रेसले सर्लाहीको हरिपुर नगरपालिका र धन्कौल गाउँपालिकासमेत गरी तीन स्थानीय तहमा जित निकालेको छ ।
