![](https://nayapatrika.blr1.cdn.digitaloceanspaces.com/news/images/congress2022-04-30-11-10-28.jpeg)
कांग्रेसले स्थानीय तहको निर्वाचनपछि पनि गठबन्धन निरन्तर रहने दाबी गरेको छ । सोमबार पत्रकार सम्मेलनमा कांग्रेसले लोकतन्त्र र संविधान बलियो बनाउन चुनावपछि पनि सत्तारूढ गठबन्धन सँगसँगै अघि जाने बताए ।
प्रवक्ता डा. प्रकाशशरण महतले सत्तागठबन्धनमा रहेका अरू दलहरूले एमालेलाई साथ दिने सम्भावना नरहेकाले गठबन्धन निरन्तर रहने जिकिर गरे । उनले गठबन्धनलाई टुटाउन एमाले अध्यक्ष केपी ओली लागिपरे पनि सम्भव नहुने बताए ।
‘हामीले गठबन्धन अगाडि बढायौँ । यद्यपि, उहाँ (ओली)ले यो रहँदैन, चल्दैन भन्नुभएको छ । हो, उहाँ त अवश्य पनि नचलोस् भन्ने चाहनुहुन्छ । हामी यसमा संवेदनशील छौँ,’ उनले भने, ‘लोकतन्त्र र संविधान बलियो पार्न कांग्रेस अहिलेको सहयात्रालाई निरन्तरता दिन तयार छ । हामीलाई विश्वास छ– हाम्रा सहयात्री दलहरू पनि त्यही मान्यताअनुसार ओलीतिर जानुहुन्न । र, यो लोकतान्त्रिक यात्रामा अगाडि बढ्नुहुनेछ ।’ प्रवक्ता महतले संविधानको रक्षा र मुलुकको विकासमा एमाले अध्यक्ष ओली असफल भएको र एमालेसँग जनतामा गएर मत माग्नै कुनै आधार नरहेको बताए । उनले स्थानीय कोणबाट हेर्दा पनि कांग्रेस बलियो देखिएको र राष्ट्रिय कोणबाट हेर्दा कांग्रेसको नेतृत्व नै ठीक देखिएको दाबी गरे । उनले अध्यक्ष ओलीलाई निर्वाचन आचारसंहिताको पालना गर्न सचेत गराउन निर्वाचन आयोगको ध्यानाकर्षणसमेत गराएका थिए ।