गठबन्धन देशको आवश्यकता हो, कांग्रेसले हुबहु कार्यान्वयन गर्नुपर्छ : शेरबहादुर देउवा

प्रधानमन्त्री तथा कांग्रेस सभापति शेरबहादुर देउवाले लोकतन्त्रको रक्षाका लागि पाँचदलीय  गठबन्धन निर्माण भएकोले स्थानीय तह निर्वाचनमा हुबहु कार्यान्वयन गरेर देखाउन कार्यकर्ताहरूलाई निर्देशन दिएका छन् । कांग्रेस मोरङले विराटनगरमा बुधबार आयोजना गरेको चुनावी सभालाई  सम्बोधन गर्दै देउवाले गठबन्धन वर्तमानमा मात्र नभएर भविष्यका लागि पनि आवश्यक भएकोले कुनै पनि तलमाथि नगरी कार्यान्वयन गर्नुपर्नेमा जोड दिए । 

देउवाले देश सबै जातजातिको भएको र कांग्रेसले गठबन्धनमा अन्तर्घात गर्दैन भन्ने उदाहरण प्रस्ट पार्न पनि तलमाथि नगरी विराटनगर महानगर मात्र नभएर सबै महानगरका गठबन्धनका उम्मेदवारहरुलाई मत दिन निर्देशन दिए । उनले भने, ‘नेपाली कांग्रेसले कुनै हालतमा धोका दिँदैन भन्ने उदाहरण तपाईंहरूले दिनुपर्छ । यो लोकतन्त्रको रक्षाका लागि देशको आवश्यकता हो ।’

देउवाले विराटनगर कांग्रेसका सस्थापक नेताहरू बिपी र गिरिजाप्रसाद कोइरालाको नगर भएकोले यहीँबाट कांग्रेसले पहिलो चुनावी सभा सुरु गरेको र यसले गठबन्धनमा सकारात्मक सन्देश जानुपर्ने बताए । 

उनले ३० वैशाखमा हुने निर्वाचनमा कुनै डरत्रासको वातावरण नरहेकोले ढुक्क भएर मतदान गर्न पनि मतदाताहरूलाई आग्रह गरे ।