- वि.सं २o७८ चैत १५ मंगलबार
प्रधानमन्त्री शेरबहादुर देउवाले मुगुको सदरमुकाम गमगढीमा नवनिर्मित सालिक र बिपी स्मृति भवनको भर्चुअल माध्यमबाट अनावरण र उद्घाटन गरेका छन् । छायाँनाथ रारा नगरपालिकाको आर्थिक तथा प्राविधिक सहयोगमा सदरमुकामस्थित अदालतचोकमा निर्मित स्वर्गीय बखतबहादुर शाहीको अर्धकद सालिकको अनावरण र बिपी स्मृति भवनको प्रधानमन्त्री देउवाले सोमबार भर्चुअल माध्यमबाट उद्घाटन गरेका हुन् ।
भर्चुअल माध्यमबाट सञ्चालित अनावरण तथा उद्घाटन कार्यक्रमलाई सम्बाेधन गर्दै प्रधानमन्त्री देउवाले स्थानीय सरकार छायाँनाथ रारा नगरपालिकाले दूरदराजबाट प्रजातन्त्रका लागि लडेको र पहिलो मुगु जिल्ला विकास समिति सभापति तथा नेपाली कांग्रेस मुगुका तत्कालीन पार्टी सभापति स्वर्गीय बखतबहादुर शाहीलाई सम्मान गर्दै सालिक बनाएकाले आफूसहित सिंगो कांग्रेस खुसी भएको र सहिदप्रति सच्चा सम्मान भएको बताए ।
नगरपालिकाकै सहयोगमा नवनिर्मित दुईतले बिपी स्मृति भवनबाट बिपीले देखेको समाजवादको सपना मुगु कांग्रेसले सफल बनाउन कार्य गर्नेसमेत आफूले विश्वास लिएको प्रधानमन्त्रीको भनाइ छ ।
सालिक अनावरण गरिएका स्वर्गीय बखतबहादुर शाहीलाई ०५८ साल माघ ३ गते राति घरमा खाना खाइरहेका वेला तत्कालीन विद्रोही पक्ष नेकपा माओवादीका कार्यकताले गोली हानी हत्या गरेका थिए । अनावरित सालिक ६ लाख ५० हजार र बिपी स्मृति भवन श्रमदानसहित करिब एक करोड लागतमा निर्माण सम्पन्न भएको छायाँनाथ रारा नगरपालिकाले जनाएको छ ।
