- वि.सं २o७८ चैत २ बुधबार
दुई जिल्लाबाट फरक-फरक नागरिकता लिने एक महिलालाई गोरखा प्रहरीले पक्राउ गरेको छ । काठमाडाैं महानगरपालिका–३२, कोटेश्वर बस्ने २८ वर्षीया पूजा ढकाललाई बुधबार पक्राउ गरिएको जिल्ला प्रहरी कार्यालय गोरखाका प्रहरी निरीक्षक धर्मबहादुर अधिकारीले जानकारी दिए ।
ढकालले २०६७ मंसिर ८ गते जिल्ला प्रशासन कार्यालय कास्कीबाट पहिलो नागरिकता र २०६७ मंसिर २८ गते जिल्ला प्रशासन कार्यालय गोरखाबाट अर्को नागरिकता लिएको खुलेको छ । ढकालले गोरखाबाट नागरिकता लिँदा गाइने सार्कीलाई बाबु देखाई पूजा गैरे सार्कीको नाममा अर्को नागरिकता लिएको भेटिएको प्रहरी निरीक्षक अधिकारीले जानकारी दिए । उनलाई पक्राउ गरी अदालतबाट सात दिनको म्याद थप गरी अनुसन्धान भइरहेको प्रहरीले जनाएको छ ।
पोखरा महानगरपालिका–६, बैदाम माइती भएकी ढकालले त्यहाँबाट उमेर नपुग्दै नागरिकता बनाएको र विदेश जाने प्रयोजनका लागि उमेर पुगेको अर्को नागरिकता गोरखाबाट बनाएको प्रहरी अनुसन्धानबाट खुलेको छ ।
नागरिकता दिने सचिवको खोजी भइरहेको र पक्राउ परेकी ढकाललाई ३ वर्ष कैद र अधिकतम २० हजारसम्म जरिवाना हुने प्रहरी निरीक्षक अधिकारीले जानकारी दिए । कानुनमा उल्लेख भएअनुसार उनले पछि लिएको नागरिकता खारेज हुने जिल्ला प्रशासन कार्यालय गोरखाले जनाएको छ ।
