चुनाव प्रचार अभियानमा सत्तारूढ गठबन्धनको विरोध नगर्न देउवाको निर्देशन

प्रधानमन्त्री एवं कांग्रेस सभापति शेरबहादुर देउवाले स्थानीयदेखि संघीय तहको निर्वाचनमा कांग्रेसलाई बहुमत दिलाउने गरी खटिन नेता तथा कार्यकर्तालाई निर्देशन दिएका छन् । पार्टी कार्यालय सानेपामा मंगलबार बसेको पार्टीका शीर्ष नेता र केन्द्रीय सदस्यको बैठकमा देउवाले सानातिना मतभेदलाई बिर्सेर पार्टीलाई बहुमत दिलाउने गरी खटिन निर्देशन दिएका हुन् । 

कांग्रेसको पक्षमा माहोल बनाउनुपर्नेमा उनको जोड थियो । देउवाले पार्टीले सञ्चालन गर्ने चुनाव प्रचार अभियानमा वर्तमान सत्तारूढ गठबन्धनको विरोध नगर्नसमेत आग्रह गरेको बैठकमा सहभागी केन्द्रीय सदस्य नैनसिंह महरले जानकारी दिए । 

कांग्रेसले आसन्न चुनाव लक्षित गरेर आगामी २९ फागुनदेखि एक महिनासम्म देशभर चुनाव प्रचार अभियान सञ्चालन गर्ने निर्णय गरिसकेको छ ।

बैठकमा महरले ‘घरघर जाऔँ, कांग्रेस जिताऔँ’ को सट्टा ‘निःशुल्क स्वास्थ्य र शिक्षासँगै सर्वसुलभ यातायात, सञ्चार र रोजगार, जनताको अधिकार र कांग्रेसको कार्यभार’ नारा राख्नुपर्ने प्रस्ताव गरेका थिए । 

आगामी निर्वाचनलाई लक्षित गरी अभियान र रणनीति तय केन्द्रीय समितिको बैठकबाटै हुनुपर्ने उनको भनाइ छ ।