प्रदेश १ को नाम  कोसी राख्न ओलीको सुझाव

एमाले अध्यक्ष केपी ओलीले प्रदेश–१ को नाम कोसी राख्न सुझाव दिएका छन् । प्रेस चौतारी नेपाल प्रदेश–१ को भेलालाई शनिबार बिर्तामोडमा सम्बोधन गर्दै ओलीले कोसी सभ्यतासँग जोडिएकाले यही नाम राख्न सुझाव दिएका हुन् । उनले प्रदेश–१ का लागि कोसीबाहेक अरू नाम उपयुक्त नभएको बताए । उनले कोसी सभ्यता नै पुरानो भएको बताए ।

शनिबार नै झापा विद्रोहको सम्झनामा सुखानीका सहिदको सालिकमा माल्यार्पण गर्दै ओलीले माओवादी र प्रचण्ड आफैँ सकिएको दाबी गरे । उनले माओवादी अध्यक्ष प्रचण्डको चिनामा नै आफैँ सकिने लेखिएकाले एमालेले सक्न नपर्ने बताए । 

उनले आफूले ०५६ मै माओवादी दश वर्ष उग्रपन्थमा चढ्छ, दश वर्ष ओरालो लाग्छ र बाँकी दश वर्षमा सकिने भविष्यवाणी गरेको बताए । अब आउँदो स्थानीय तहको निर्वाचनमा माओवादीको हालत देखिने उनको भनाइ थियो । 

त्यस्तै, झापा गोल्डकपको उद्घाटन गर्दै ओलीले बिर्तामोडमा रंगशाला निर्माणमा भूमिका खेल्ने बताए । उनले डोमालाल राजवंशी रंगशाला जालझेल गरेर भूमाफियाले कब्जा गर्न खोजेको बताउँदै त्यसो हुन नदिने बताए । उनले आफ्ना पार्टीका नेताको अगुवाइमा केही जमिन फिर्ता ल्याएको र बाँकी पनि ल्याउने दाबी गरे ।