- वि.सं २o७८ फाल्गुण ४ बुधबार
नेकपा (माओवादी केन्द्र)को संसदीय दलको बैठकले यथास्थितिमा एमसिसी पास गराउन नसकिने निष्कर्ष निकालेको छ। संसदीय दलको बैठकपछि सञ्चारकर्मीहरूसँग कुरा गर्दै नेता देव गुरुङले यथास्थितिमा पास गराउन नसकिने निर्णय भएको जानकारी दिए।
संशोधनविना जबर्जस्ती एमसिसी संसदमा पेस भए विपक्षमा मतदान गर्ने माओवादी संसदीय दलले निर्णय गरेको छ। सत्तारुढ पाँच दलको निर्णय मात्रै सरकारको निर्णय हुने अन्यथा माओवादी केन्द्र सरकारमा नरहने बैठकले निष्कर्ष निकालेको नेता गुरुङले जानकारी दिए। सदन सुचारु नगरी कुनै एजेन्डा अघि बढ्न नसक्ने भएकाले सदन सुचारु गर्न जोड दिनुपर्ने पनि सो बैठकले निर्णय गरेको छ।
