हिउँ खेल्न गएका दुई बालक  ११ दिनपछि मृत फेला

 गत २० माघमा हिउँ खेल्न घरबाट निस्केका गोरखाका दुई बालक आइतबार मृत भेटिएका छन् । बारपाकसुलिकोट गाउँपालिका–२ का १६ वर्षका करण घले र वडा नम्बर १ का १६ वर्षकै सञ्जय घले बारपाकभन्दा पर भुनेखर्क भन्ने ठाउँमा मृत अवस्थामा फेला परेको प्रहरी कार्यालय गोरखाका डिएसपी प्रकाश दाहालले बताए ।

स्थानीयवासी र प्रहरीको संयुक्त खोजी टोलीले आइतबार साँझ ५ बजेतिर बाटोबाट करिब एक सय फिट तल खसेको अवस्थामा दुवैजना मृत भेटेको उनले जानकारी दिए । घरबाट हिउँ खेल्न भनेर हिँडेको ११ दिनपछि उनीहरू मृत अवस्थामा फेला परेका हुन् ।

बाक्लो हिमपातका कारण उनीहरू हिउँले पुरिएर हराइरहेकोमा हिउँ पग्लिँदै गएर देखिएको दाहालको भनाइ छ । २३ माघमा प्रहरीचौकी बारपाक र जिल्ला प्रहरी कार्यालय गोरखामा जानकारी दिएपछि मात्र स्थानीय र प्रहरीले दुई बालकको निरन्तर खोजी कार्य गरेका थिए । आइतबार साँझ दुवैको शव गाउँ ल्याइएको उनले बताए ।