- वि.सं २o७८ माघ २० बिहीबार
राईनास नगरपालिका– ६, सिम्लेखोलामा ट्याक्टर दुर्घटना हुँदा एकजनाको घटनास्थलमै मृत्यु भएको छ । बुधबार दिउँसो साढे ३ बजेतिर इँटा लिन जाँदै गरेको ग.१ त ४४४५ नम्बरको ट्याक्टर दुर्घटना हुँदा ४३ वर्षीय अमृत चिलुवालको मृत्यु भएको प्रहरीले जनाएको छ ।
राईनासको तिनपिप्लेबाट धमिलीकुवा जाँदै गरेको ट्याक्टरमा सवार तीनजनामध्ये चिलुवालको घटनास्थलमै मृत्यु भएको र सहयोगी राईनास नगरपालिका– ६ का गोपाल परियारको स्थानीय स्वास्थ्य संस्थामा प्राथमिक उपचार गरी घर फर्केका छन् ।
मृतक चिलुवालको शवलाई पोस्टमार्टमका लागि बेंसीसहरस्थित जिल्ला अस्पताल लमजुङमा ल्याइएको छ । इँटा लिन जाँदै गरेको ट्याक्टर अगाडिबाट आउँदै गरेको सवारीसाधनलाई साइड दिने क्रममा छेउमा पुगेको थियो । सडकछेउमा पुग्ने क्रममा सडकबाट लडेर करिब १५–२० मिटर तल सिम्लेखोलामा खसेर ट्याक्टर दुर्घटना भएको प्रहरीले जनाएको छ ।
चालक स्थानीय दीपक परियारलाई नियन्त्रणमा लिई अनुसन्धान अघि बढाइएको जिल्ला प्रहरी कार्यालयका सूचना अधिकारी एवं इन्स्पेक्टर जगदीश रेग्मीले बताए।
