- वि.सं २o७८ माघ १३ बिहीबार
काठमाडौं उपत्यकाका सडकआसपासका रूख–बिरुवा काँटछाँट गर्न थालिएको छ। काठमाडौं महानगरपालिकाले तिनकुने–माइतीघर सडकखण्ड क्षेत्रमा रहेका रूख–बिरुवा काँटछाँट गर्न लागेको हो।
रूख–बिरुवा बढेर सवारी ओहोरदोहोरमा अवरोध पुर्याउने भएकाले बाटोतर्फ नुहेका रूख–बिरुवा काटिएको नगर प्रहरी प्रमुख धनपति सापकोटाले जानकारी दिए। उनका अनुसार सडकआसपासका रूख–बिरुवा छोटा पार्ने र आकार दिने सिजन यही हो। यो समयमा काटेपछि राम्ररी पलाउन सक्ने भएकाले अहिले काँटछाँट गर्न लागिएको हो।
‘यी सुन्दरताका लागि रोपिएका रूख–बिरुवा हुन्। सडक र सडकबत्ती छेकेका बिरुवा समय समयमा छोट्याउनुपर्छ,’ उनले भने, ‘दुई वर्षदेखि हामीले रूख–बिरुवाका हाँगाहरू काटेका थिएनौँ। यो सिजनमा काटेपछि दुई तीन महिनामै पलाएर हरियाली हुन्छ।’
