- वि.सं २o७८ माघ १२ बुधबार
पूर्व–पश्चिम राजमार्गअन्तर्गत सप्तरीमा गएराति पुनः एक ट्रकमा आगजनी भएको छ । अग्निसाइर कृष्णसवरण गाउँपालिका– ४ विशाल चोकस्थित पूर्वतर्फ गइरहेको ना.५ ख १९११ नम्बरको ट्रकमा आगजनी भएको हो ।
कुखुराको दाना बोकेर गइरहेको सो ट्रकमा राति करिब ११ बजेतिर आगजनी भएको इलाका प्रहरी कार्यालय कञ्चनपुरका प्रहरी नायव उपरीक्षक रामकुमार यादवले जानकारी दिए । ‘कसले र किन ट्रकमा आगजनी गरेको विषयमा अनुसन्धान भइरहेको छ,’ उनले भने। चालक भने सम्पर्कमा नआएकाे उनले बताए ।
अज्ञात समूहद्वारा गरिएको आगजनीले ट्रक पूर्ण रूपमा जलेको छ । यसअघि पुस १६ गते पनि सोही गाउँपालिका– ५ महुली पुलमा एक ट्रक जलाइएको थियो ।
