आरटी–पिसिआरकाे परीक्षण शुल्क घट्यो

अब सरकारी प्रयोगशालामा आठ सय र निजीमा एक हजार पाँच सय

कोरोना पत्ता लगाउन गरिने आरटी–पिसिआर परीक्षण शुल्क घटाइएको छ । किटको मूल्य बजारमा सस्तो हुँदा पनि परीक्षणको शुल्क दुई हजारभन्दा कम नभएकाले त्यसलाई समयसापेक्ष परिमार्जन गर्न आवश्यक ठानेको स्वास्थ्यसचिव डा. पोखरेलले बताए । 

सरकारी प्रयोगशालामा गरिने शुल्क आठ सयमा झारिएको छ भने निजीमा एक हजार पाँच सय तोकिएको छ । यसअघि सरकारीमा हजार र निजीमा दुई हजार तोकिएको थियो । सरकारले निजी प्रयोगशालाको शुल्क पनि हजारमा झार्ने बताएको थियो । तर, निजी क्षेत्रको दबाबपछि १५ सय कायम गरिएको हो । यसमा निजी क्षेत्रले पनि सहमति दिएका छन् । अधिकारीहरूले बताएअनुसार हाल पाँच सयमा पिसिआर परीक्षण गर्न सकिन्छ । 

पछिल्लो २४ घन्टामा देशभर ११ हजार तीन सय ५२ जनामा कोरोना पुष्टि भएको छ । यो संख्या एकैदिन देखिएको सबैभन्दा धेरै हो । २३ हजार चार सय नौ नमुना परीक्षण गर्दा यति धेरै संख्यामा पुष्टि भएको हो । पछिल्लो २४ घन्टामा चारजनाको मृत्यु भएको छ भने एक लाख ९५ हजार चार सय २२ जनाले खोप लगाएको स्वास्थ्य मन्त्रालयले जनाएको छ ।