- वि.सं २o७८ पौष २५ आइतबार
गण्डकी प्रदेशस्तरीय खुला आर्चरी प्रतियोगिताको उपाधि म्याग्दीका सुजन पुनले हात पारेका छन् । नवौँ राष्ट्रिय खेलकुद प्रतियोगितालाई लक्षित गर्दै पोखरामा आर्चरी प्रतियोगिता आयोजना गरिएको हो ।
कास्की जिल्ला आर्चरी संघको आयोजना तथा नेपाल इन्भेष्टमेन्ट बैंकको मुख्य प्रायोजनमा शनिबार प्रतियोगिता सम्पन्न भएको हो । फाइनलमा म्याग्दीकै उमेश तिलिजालाई ६–२ सेट प्वाइन्टले पराजित गरेका पुनले उपाधिसँगै स्वर्ण पदक र नगद २५ हजार पाएका छन् । यस्तै, हाल बेलायतमा रहेका पूर्व आर्चरी खेलाडी कृष्ण तुलाचनले प्रायोजन गरेको एक लाख रुपैयाँबराबरको रिकभर बो सेट पुरस्कार पाए । उपविजेता तिलिजाले नगद २० हजार पुरस्कार पाए ।
यसैगरी, ६० वर्षमाथिको भेट्रान्सतर्फको खेलमा मार्फा थकाली समाजका हिरामान लालचनले २३३ अंकसहित उपाधि हात पार्दा तीनगाउँले थकाली समाजका बुद्धि थकाली २२५ अंकसहित उपविजेता बने । प्रतियोगितामा कास्की, मुस्ताङ, बाग्लुङ, मनाङ, पर्वत र म्याग्दीका गरी ६९ खेलाडीको सहभागिता थियो । भेट्रान्सतर्फ सातजनाको सहभागिता रहेको थियो ।
आयोजक कास्की जिल्ला आर्चरी संघका अध्यक्ष योगेन्द्र शेरचनका अनुसार प्रतियोगिताको सेमिफाइनलमा पुगेका चार खेलाडीसँगै अन्य १२ गरी १६ जनालाई नवौँ राष्ट्रिय खेलकुदलाई लक्षित गर्दै बन्द प्रशिक्षणमा राखिने भएको छ ।
