- वि.सं २o७८ पौष २० मंगलबार
पाणिनि गाउँपालिका उपाध्यक्ष तथा एकीकृत समाजवादीका केन्द्रीय सदस्य लक्ष्मी गौतम कांग्रेस प्रवेश
कांग्रेस महामन्त्री गगन थापाले अब पार्टीभित्र गुट र भागबन्डाको अन्त्य हुने बताएका छन् । कांग्रेसको पाणिनि गाउँपालिका समितिले दुर्गाफाँटमा गरेकोे सभामा महामन्त्री थापाले भने अब गुट र भागबन्डाको अन्त्य गर्दै विधानसम्मत ढंगले पार्टी चल्ने बताएका हुन् ।
‘हिजो जे भयो भयो, अब हामीलाई पार्टीलाई विधानसम्मत रूपमा चलाउनेछौँ,’ उनले भने, ‘गुटबन्दी अन्त्य हुनेछ । भागबन्डाका आधारमा पार्टीमा लेनदेन चल्नेछैन ।’ उनले आगामी वैशाखमा स्थानीय तह र मंसिरमा प्रदेश र संघको निर्वाचन हुने भएकाले तयारीमा लाग्न कांग्रेस कार्यकर्तालाई आग्रह गरे ।
कांग्रेस केन्द्रीय सदस्य तथा संसदीय दल सचेतक पुष्पा भुसालले केपी ओलीका कारण मुलुक पछाडि धकेलिएको दाबी गरिन् । ‘ओलीले दुई–दुईपटकसम्म प्रतिनिधिसभा विघटन गरी मुलुकलाई अँध्यारो सुरुङभित्र प्रवेश गराउन खोजे । हामीले लड्यौँ, सर्वोच्च अदालतले पुनस्र्थापना गरिदियो । अहिले फेरि त्यही एमाले पटक–पटक संसद् अवरुद्ध गरेर महत्वपूर्ण निर्णय हुन दिइरहेको छैन,’ उनले भनिन्, ‘एमालेकै कारण मुलुक पछाडि परेको छ ।’
एकीकृत समाजवादीका केन्द्रीय सदस्य लक्ष्मी गौतम कांग्रेस प्रवेश
कार्यक्रममा पाणिनि गाउँपालिका उपाध्यक्ष तथा एकीकृत समाजवादीका केन्द्रीय सदस्य लक्ष्मी गौतम कांग्रेस प्रवेश गरिन् । ०७४ को स्थानीय तह निर्वाचनमा एमालेबाट पाणिनि गाउँपालिका उपाध्यक्षमा निर्वाचित गौतमले एमाले विभाजनपछि एकीकृत समाजवादी रोजेकी थिइन् ।
