कोसी करिडोरको काम ९० प्रतिशत सकियो, चार महिनामा सम्पन्न हुने

ताप्लेजुङको मैवाखोला गाउँपालिका–१, ढुंगेसाँघुमा निर्माणाधीन दुई सय २० केभिए कोसी करिडोर विद्युत् सबस्टेसनको काम ९० प्रतिशत सकिएको छ । सन् २०१८ जुनदेखि सुरु भएको कोसी करिडोर २०२० डिसेम्बरसम्ममा सक्नुपर्ने थियो । तर, कारोनाको कारण देखाउँदै पहिलोपटक सन् २०२१ डिसेम्बरसम्म म्याद थपिएको छ । यो अवधिमा पनि निर्माण कार्य नसिकने भएपछि फेरि म्याद थप्ने तयारी भएको छ । 

काम सुरु भएकोे चार वर्षको अवधिमा सबस्टेसनको स्ट्रक्चरको काम सकिएको साइट इन्चार्ज इन्जिनियर रवीन्द्र झाले बताए । उनका अनुसार भवन निर्माण, ट्रान्सफर्मर राख्ने केन्द्रको व्यवस्थापनजस्ता काम सकिएको छ । अब अर्थ कटिङ, फिलिङ तथा सामान्य कामहरू बाँकी रहेको र सो पनि चार महिनाभित्र सकिने झाले बताए । 

ठेक्का सम्झौताअनुसार तेह्रथुमको वसन्तपुरदेखि अहिले निर्माण भइरहेको कोसी करिडोर सबस्टेसनसम्म लाइन ल्याउनुपर्नेछ । त्यसका लागि अहिले एक सय ३२ विद्युत् टावर बनाउनुपर्नेमा ९७ वटा टावर बनाइसकिएको इन्जिनियर झाले बताए । अहिले ३५ वटा टावरको पनि काम भइरहेको छ । झन्डै दुई सय रोपनी क्षेत्रफलमा फैलिएको सबस्टेसन निर्माणको कुल लागत २० मिलियन डलर अर्थात् झन्डै दुई अर्ब ३२ करोड रहेको छ । अहिले निर्माण कम्पनी आफैँले दोभानबाट ढुंगेसाँघुको तेल्लाबुङसम्मको ट्र्याक खोलेको छ । साथै, मदन भण्डारी राजमार्गका ठाउँ–ठाउँमा स्तरोन्नतिको कामसमेत गरेर सामानको ढुवानी गरेको छ । 

हाल जिल्लामा उत्पादन भएको पाँच सय मेगावाटसम्म बिजुलीलाई कोसी करिडोरबाट पास गर्न सकिने इन्जिनियर झाले बताए । उनले अहिले टावरमा एकतर्फ मात्र तार लगाइएकाले पाँच सय मेगावाट मात्र बिजुलीलाई पास गर्न सकिने बताए । एकतर्फको तार भने यो ठेक्कामा नभएको र सो तारसमेत लगाएपछि हजार मेगावाटसम्म बिजुली पास गर्न सकिन्छ । कोसी करिडोर ढुंगेसाँघुबाट तेह्रथुमको वसन्तपुर सबस्टेसन हुँदै सुनसरीको इनरुवा स्टेसनमा जोडिने र केन्द्रीय प्रसारणमा जाने बताइएको छ ।