धानखेतमा हाल्न मलका लागि घन्टौँ लाइनमा बसेका चितवनका किसान गहुँ, जौ र तोरीमा हाल्ने मल नपाएपछि पुनः लाइनमा बस्न बाध्य भएका छन् । जिल्लाभरि नै रासायनिक मल युरिया, डिएपी र पोटास अभाव भएको छ । पैसा तिरेर पनि नपाएपछि किसानहरू आक्रोशित भएका छन् ।

भरतपुर–६, गीतानगर बजारमा रहेको सर्वोदय बहुउद्देश्यीय सहकारी संस्था (साझा)मा मल लिन नागरिकतासहित बसेकी इन्द्रपुरीकी सविता गुभाजूले भनिन्, ‘पैसा तिर्दा पनि मल नपाइने हाम्रो कस्तो कृषिप्रधान देश हो ? लाइनमा बसेर १० केजीभन्दा बढी पाइँदैन ।’

पुलरकी गंगा अर्यालको पनि गुनासो उस्तै छ । उनको आफ्नै एक बिघा जमिन छ । त्यसबाहेक अरूको १४ कट्ठा जमिनमा तोरी लगाएकी छिन् । १० दिनअघि नै उनको बारीमा मल चाहिएको हो । मलको लाइनमा बसेकी उनलाई मल पाइन्छ–पाइँदैन भन्ने कुनै टुंगो छैन ।

सर्वोदय बहुउद्देश्यीय सहकारी संस्था (साझा)मा ३५ बोरा युरिया र १५ बोरा डिएपी मल आएको थियो । नगरिकता हेरेर प्रतिकिसान १० किलोका दरले मल वितरण गरिरहेको थियो । यहाँका किसानले रोपाइँको समयमा पनि यस्तै हैरानी व्यहोर्नुपरेको थियो ।