- वि.सं २o७८ मङ्सिर ७ मंगलबार
गृहमन्त्री बालकृष्ण खाणले सीमा क्षेत्रमा बसोबास गर्ने सबै नेपाली अब्बल राष्ट्रवादी भएको बताएका छन् । नेपालको राष्ट्रियता, सान र पहिचान सीमा क्षेत्रका नेपाली जनताबाटै कायम रहेको मन्त्री खाणले बताए ।
रुपन्देहीको कोटहीमाई गाउँपालिका– ५ मर्चबारीमा रहेको मर्चबारी माई मन्दिरमा पूजाआजापछि कांग्रेसका नेता तथा कार्यकर्तासँगको भेटमा उनले सीमा क्षेत्रमा बसोबास गर्ने नेपाली नागरिकले नेपाल मिचिनबाट जोगाएको बताएका हुन् ।
सीमामा बसोबास गर्ने नेपालीले सीमा क्षेत्रमा रहेको खेत, खलियान, आली, बगैँचालगायतका स्थललाई मेरो हो भन्दै जोगाएकोले आज पूरा देश जेगिन पुगेको गृहमन्त्री खाणको भनाइ थियो ।
हिउँदे बाली लगाउने वेलामा देखिएको रासायनिक मलसम्बन्धी समस्या छिटो समाधान गर्ने पनि उनले बताए । रुपन्देहीको मर्चबारमा भएको कार्यकर्ता भेटघाटमा गृहमन्त्री खाणले रासायनिक मल छिटोभन्दा छिटो उपलब्ध गराउने प्रतिबद्धता जनाएका हुन् ।
