- वि.सं २o७८ कार्तिक २२ सोमबार
नेपाल बार एसाेसियसनले प्रधानन्यायाधीश चोलेन्द्रशम्शेर जबराको राजीनामा माग गर्दै भइरहेको आन्दोलनलाई लिएर भ्रमपूर्ण प्रचार नगर्न चेतावनी दिएको छ। बारले आज विज्ञप्ति निकालेर आन्दोलन भइरहेको समयमा सरोकारवालाहरूको ध्यान मोड्न सञ्चारमाध्यम र सामाजिक सञ्जालमा भएको प्रचारलाई लिएर ध्यानाकर्षण भएको जनाएको हो।
‘पवित्र उद्देश्यबाट गरिएको यो महत्वपूर्ण आन्दोलनको कार्यक्रमबाट सरोकारवालाहरूको ध्यान अन्यत्रै मोड्ने दूषित मनसायका साथ नेपाल बार एसाेसियसनका पदाधिकारी सदस्यहरूले आफू र आफ्ना परिवारका सदस्यहरूलाई न्यायाधीश वा अन्य निकायमा नियुक्ति लिनका लागि सौदाबाजीस्वरूप ने.बा.ए.ले प्रधानन्यायाधीशविरुद्ध आन्दोलन गरेको, अन्य कसैको कुत्सित अभिष्ट पूरा गराउन गोटी बनेको भन्नेलगायतका झुठा, अनर्गल आरोपहरू केही अनलाइन पत्रिका तथा सामाजिक सञ्जालमा आएकोप्रति गम्भीर चासो, सरोकार र असहमति व्यक्त गर्दछौँ,’ बारका महासचिव अधिवक्ता लिलामणि पौडेलले जारी गरेको विज्ञप्तिमा भनिएको छ।
बारले आफ्नो परम्पराअनुसार सल्लाहकार समितिको सुझाब, बार एकाइहरूको सुझाब र न्यायपालिकामा बढ्दो विकृति, विसंगति, भ्रष्ट्राचार, बिचौलियाको बिगबिगीलाई मध्यनजर गरी विरोध र आन्दोलनका कार्यक्रमहरू गर्दै आएको उल्लेख गरेको छ।
