- वि.सं २o७८ कार्तिक १२ शुक्रबार
संखुवासभाको चिचिला गाउँपालिका– २ दिदिङमा सामान्य विवाद हुँदा खुकुरी प्रहार भएपछि एक गम्भीर घाइते भएका छन् । चिचिला गाउँपालिका– २ दिदिङका स्थानीय ५० वर्षीय दुर्गाबहादुर गुरुङलाई छिमेकी युवाले सामान्य विवाद हुँदा खुकुरी प्रहार गरेर गम्भीर घाइते बनाएको जिल्ला प्रहरी कार्यालय संखुवासभाका डिएसपी लालध्वज सुवेदीले बताए ।
उनका अनुसार बिहीबार साँझ ७ बजेतिर सामान्य विवाद हुँदा सोही ठाउँका ३० वर्षीय दिनेश राईले खुकुरी प्रहार गर्दा गुरुङ गम्भीर घाइते भएको र उपचारका लागि जिल्ला अस्पताल ल्याएका थिए ।
जिल्ला अस्पताल खाँदबारीमा उपचार हुन नसकेपछि थप उपचारका लागि विराटनगरको न्युरो अस्पताल लगिएको प्रहरीले जनाएको छ । घाइते गुरुङको खुकुरी प्रहारबाट टाउको, आँखा र शरीरको विभिन्न भागमा चोट लागेको डिएसपी सुवेदीको भनाइ छ । खुकुरी प्रहार गर्ने राई भने फरार रहेकाले खोजी भइरहेको जिल्ला प्रहरी कार्यालय संखुवासभाले जनाएको छ ।
